SULISUNIK AMIGAATEQARNEQ

NPK: Meeqqerivinni atuisunut akiliuteqartitsinerup atorunnaarsinneqarnissaa naleqqutinngilaq

Ulluunerani meeqqanut paaqqinnittarfinnut angajoqqaat 2028-miit akiliuteqartarunnaarnissaat Naalakkersuisut siunniuppaat. Tamannali NPK-mit iluarineqanngilaq.

– Meeqqerivinni sulisut sulinermi atugaat pitsanngorsarniarlugit akissarsiaasalu pitsaanerulersinneqarnissaat anguniarlugu ilungersorluta ullumikkut sulivugut. Tamakku annertunerusumik Namminersorlutik Oqartussanit ukkatarineqartariaqarput, NPK-mi siulittaasoq Arnaq Brønlund oqarpoq.
Saqqummersinneqarpoq

2027-mut aningaasanut inatsisissamut isumaqatigiissut saqqummiunneqarmat angajoqqaat meeqqerivinnik atuinermut akiliuteqartarunnaarnissaannik Naalakkersuisut siunniussipput. Meeqqerivinnut akiliuteqartarunnaarnissaq 2028-mi atuutilissaaq, meeqqerivinnulli akiliuteqartarnerup atorunnaarsinneqarnissaa kommunit qanimut suleqatigalugit ingerlanneqartussaammat suliniutip piareersarneqarnera 2027-mi aallartissaaq.

Taamaattorli suliniut perorsaasut kattuffiannit isumaqatigineqanngilaq. Nunami meeqqeriviit akiliuteqarfiunersut akiliuteqarfiunnginnersulluunniit ukkatarinagu, allatigut suliniuteqartoqartariaqartoq kattuffik isumaqarpoq.

– Meeqqerivinni sulisussaaleqinerup taama annertutiginera eqqarsaatigalugu, meeqqerivinnut akiliuteqartarnerup atorunnaarsinneqarnissaa eqqortuunngilaq, NPK-mi, Kalaallit Nunaanni Perorsaasut Kattuffianni, siulittaasoq Arnaq Brønlund tusagassiuutinut nalunaarummi oqarpoq.

Sulisussanik pissarsiniarneq politikkikkut ukkatarineqartariaqartoq perorsaasut angajoqqaallu siusinnerusukkulli oqaatigereerpaat.

Sulinermi atugassarititaasut misissorneqarlik

NPK-p erseqqissarpaa meeqqeriviit akeerunnerat sulisunik amerlanerusunik pissarsinermik immini kinguneqarnavianngitsoq. Paarlattuanik Arnaq Brønlund politikerit kaammattorpai, perorsaasut meeqqerivinnilu sulisut allat akissarsiaasa sulinermilu atugassarititaasa pitsanngorsarnissaat annertunerusumik ukkatarissagaat.

– Sulisussaaleqineq annertooq aaqqinniarlugu sulisut sulinermi atugaannik pitsanngorsaaanissaq akissarsiallu appasippallaarujussuartut aaqqinneqarnissaat aaqqiissutissatuaapput. Sulisitsisuttaaq suliffimmi avatangiisinik ataavartumik pitsanngorsaaqqullugit kajumissaarpagut, NPK-mi siulittaasoq oqarpoq.

Kommunit meeqqerivinnik akisussaasuupput. Taamaattumik Naalakkersuisut kommunit suleqatigalugit meeqqerivinnut akiliuteqartarneq pillugu allanngortitsissapput.

Powered by Labrador CMS