Aningaasaliinermut aningaasaateqarfiup Amaroq 100 millioninik aningaasaliiffigigaa
Danmarks Eksport- og Investeringsfond aatsitassarsiorfimmi Amaroq Minerals Ltd-p piginneqataassutinik 100 million koruuninik nalilinnik pisivoq.
Amarumi pisortap Eldur Olafssonip kuultisiorfimmi Nalunami Nanortallip eqqaaniittumi kuultisiorneq nalliuttorsiutigigaa.
Assi: Amaroq
Danskit aningaasaateqarfiata EIFO-p (Danmarks Eksport- og Investeringsfond) Amaroq Minerals Ltd.-imi piginneqataassutsini maanna annertusivai.
EIFO-p aatsitassarsioqatigiiffimmi børsimut nalunaarsukkami piginneqataassutit 100 million koruuninik naleqartut pisiarai, aningaasaateqarfik nammineq ilisimatitsivoq. EIFO 2019-imiilli Amarumi aningaasaliisuuvoq, tamannalu Danmarkimi naalakkersuisut Naalakkersuisullu akornanni inuussutissarsiornikkut suleqatigiinneq aqqutigalugu pivoq.
- Kalaallit Nunaat EIFO-p pingaarnertut sammisartagaraa, suliniutitsinnillu annertusaarusuppugut. Aningaasaliinerput periusissiaq naapertorlugu Kalaallit aatsitassanik Nunaannilu aningaasaqarnerup siuarsaanissamut suleqataanissatsinnut periussiatsinni pingaarutilittut isigaarput, EIFO-mi pisortaaneq Peder Lundquist, oqarpoq.
- Amaroq Minerals angusarissaarluarpoq, ingerlatseqatigiiffiullu ineriartortuarnissaanut tapersersuisinnaagatta nuannaarutigaarput.
Suliniutit nutaat
EIFO-p periusissiaq naapertorlugu aningaasaliinera aningaasaliisunit nutaanit aningaasaliisartullu pioreersut, ilaatigut Industriens Pensionimit, 395 million koruuninik aningaasaliissuteqarnermut ilaavoq.
Amaroq pingaartumik Kalaallit Nunaata kujataani Nalunami kuultisiorfimmi, 2024-mi tunisassiulersumi, suliaqarnini pillugu ilisimaneqarpoq.
Aningaasat taakku ilaatigut Kitaani paasissutissiivimmik pilersitsinissamut aamma misissueqqissaarnermi qillerinerit sukkanerulersinnissaannut atorneqartussaapput.
