Aningaasat millionikkaat innuttaasunut utertinneqassasut
2024-mi akileraarutit pillugit inaarutaasumik naatsorsuutit akileraartartut 48.893-it E-boksiminni sisamanngornermi takusinnaalerpaat.
Assi: Leiff Josefsen
Akileraartarnermut Aqutsisoqarfik inunnut 32.743-nut akileraarutinut akiliivallaarsimasunut aggustip 29-ani aningaasanik utertitsissaaq. Aningaasat katillugit 325,9 mio. koruunit tunniunneqassapput.
Aammattaaq innuttaasut 3.526-t akileraarnikippallaarsimasut 121,5 mio. koruunit akiligassinneqarput.
Innuttaasut 2024-mut akileraarutaat inaarutaasumik naatsorsorneqarnerat naammassimmata kisitsisit saqqummiunneqarput, Aningaasaqarnermut Akileraartarnermullu Naalakkersuisoqarfik tusagassiuutinut nalunaarummi allappoq.
Akileraarutit pillugit inaarutaasumik naatsorsuutit ullumi sisamanngornermiit E-boksimi takuneqarsinnaapput tallimanngorpallu Sullissivik.gl-imi 'Akileraarutikka'-mi takuneqarsinnaallutik.
Akileraarutaavallaarsimasut utertoorutissat tunniunneqartinnagit, pisortanut akiitsut millionillit matussuseqqaarneqassapput:
- 36,6mio. kr.-it nunatsinni kommuninut, INI A/S-imut, Iserit A/S-imut aamma Nukissiorfinnut il.il. akiitsunut matussutissatut akilersinneqarput sinneruttullu 51,8 mio. kr.-it Namminersorlutik Oqartussanut akiitsunut matussutigineqarlutik, Aningaasaqarnermut Akileraartarnermullu Naalakkersuisoqarfik paasissutissiivoq.
Akileraartarnermut Aqutsisoqarfiup utertoorutissat NemKonto-mut ikissavai.
