Apummik sisoortoqartillugu Sermersooq upalungaarsimanerulerniarpoq
Kommuneqarfik Sermersooq upalungaarsimanerup qanoq pitsanngorsagaasinnaaneranik pilersaarusiorpoq, apummik sisoortoqartillugu inuk apummit matooruussaappat qaqqaniluunniit allatut ajoqusertoqarpat, ikiuisinnaaneq pitsaanerulerniassammat.
Qaqqani ajutoortoqartillugu qatserisartut annaassiniarnermik ilinniartinneqarnissaat pilersaarutaavoq.
Søren Duran Duus
Illoqarfiit pingaarnersaata kommuniata Norgemi upalungaarsimanermut immikkut ilisimasallit suleqatigalugit Nuup Tasiilallu eqqaanni pinngortitami qanoq inuunermik annaassiniartoqarsinnaanersoq pilersaarusiorsimavaa.
2023-mi januaarip aallaqqaataaniit 2024-mi juunip 15-iata tungaanut annaassiniarnerit ikiueqqaarnerillu kommunit upalungaarsimasuisa peqataaffigisimasaat misissorneqarput.
- Annaassiniarnermi suliat qulit, Tasiilap Nuullu eqqaani pisimasut aallaavigineqarput. Tasiilami amerlanertigut suliat SAR-iusut pineqartarput, tassani qamuteralaat atorlugit suliat ingerlanneqartarlutik. Nuup eqqaani amerlanertigut ajoqusersimasut, apummillu sisoortoqarsimatillugu annaassiniarnerit minnerusut eqqartorneqarlutik, suliassamik saqqummiussinermi Sanarfinermut Avatangiisinullu Ataatsimiititap ataatsimiinnerani kingullermi, aggustip arfineq-pingajuanni isummerfigineqartumi, tamanna erserpoq.
Ilinniartitsineq, atortut sumiiffimmillu ilisimasaqarneq
Naak pinngortitami illoqarfiup avataaniittumi annaassiniarneq Kalaallit Nunaanni Politiit aammalu peqqinnissaqarfimmit akisussaaffik tigummineqaraluartoq, amerlasuutigut kommunimi upalungaarsimasut ikiortiserineqartarput, annaassiniarnerup ingerlanneqarnissaa ilaannakortumik tamakkiisumilluunniit ingerlanneqarsinnaasarluni, suliassamik saqqummiussinermi allassimavoq.
Apummik sisoortoqartillugu ajutoornerni annaassiniartartut ilinniarluarsimanissaat eqqortunillu atortoqarnissaat pingaaruteqartoq, upalungaarsimasut suliniummik nassuiaataanni inerniliunneqarpoq. Aammattaaq pitsaasumik sukkasuumillu annaassiniartoqassappat sumiiffimmik ilisimasaqarnissaq pingaaruteqarpoq.
- Nuummi SAR-eqarpoq, Nuummi qamuteralattartut eqimattaannik aallaavillit. Taanna kajumissutsimik upalungaarsimasoqarpoq, taannalu Nuup eqqaani SAR-imik suliaqarnermi atorneqartarpoq. Kajumissutsimik upalungaarsimasuummat, taamaattumik SAR-imik suliaqartartut piffissami sivisuumi annaassiniarnermik aallartitsiniaasinnaasarput, ilisimaneqanngilarlu SAR-imik suliaqartartut ilaasortai qassit ornigussinnaanersut, suliniummut nassuiaammi allassimavoq.
Qamuteralaat nutaat atortullu pingaarutillit allat pisiarinissaat pisariaqartoq naqissuserneqarpoq. Aammattaaq siunissami qatserisartut annaassiniartarnermik akisussaatinneqartalerniarput.
Qatserisartut 20-t
“Tasiilami Nuummilu qatserisartunik upalungaarsimasunik pitsaasunik nukittuunillu qulinik, atortorissaarutinillu atorsinnaalluinnartunik pinngortitamilu ajoqusersimasut annaanneqarsinnaanissaannut piginnaasaqarluartunik pilersitsisoqassasoq” suliniummut nassuiaammi nalilerneqarpoq.
- Qatserisartut pinngortitami angalanermi piginnaasatik atorluartassavaat. Annaassiniarnermi, qatserinermi, qaqqani qaffasissumilu annaassiniarnermi aamma illunik uppititsinermi piginnaasaqarnerat atorluarlugu piginnaasaat annertusarneqassapput, ilisimatitsissutigineqarpoq.
- Atortut piginnaasallu pitsaanerit naammanngillat. Politiit, peqqinnissaqarfiup Issittumilu Sakkutooqarfiup suleqatigiilluarnerunissaat siunissami upalungaarsimanermut ilaavoq, taamaalilluni apummik sisoortoqarnerani ajutoortoqartillugu ataqatigiissaarisoqarlunilu sunniuteqarluartumik iliuuseqartoqarsinnaanissaa qulakkeerneqassasoq naqissuserneqarpoq, aammalu Kalaallit Nunaanni apummik sisoortoqartillugu aarlerisaarinermik pilersitsisoqarsinnaanersoq naliliiffiginiarlugu DMI-p oqaloqatigineqarnissaa kaammattuutigineqarpoq.
Kalaallit Nunaanni Politiit Peqqinnissaqarfimmilu upalungaarsimasut oqaloqatiginissaat pisariaqartoq aammattaaq erseqqissarneqarpoq, suliassat qanoq aningaasatigut agguataarneqarnissaat eqqartorneqassalluni. Maannamut annaassiniarnermi ikiuuttoqarsimatillugu kommuni akiligassiisarpoq.
Apummik sisoortoqartillugu qanoq iliortoqartariaqarneranik pikkorissaanerit
Apummik sisoortoqartillugu qanoq iliortoqartariaqarneranik qatserisartunik pikkorissaasarnissaq imatut imaqarpoq:
- Sumiiffinni apummik sisoorfiusinnaasuni sumiissusersiorsinnaaneq
Inunnik apummit matoorussaasimasunik sammivissiuineq
Inuit apummit matoorussaasimasut ujarniarlugit annaanniarlugillu apummik sisoortoqartillugu atortorissaarutit atornissaat
Ikiueqqaarneq ajoqusersimasunillu passussineq
Qamuteralannik angalaneq
- Annaassiniarnerni nammineq isumannaatsuunissaq
Apummik sisoortoqarnerani ajutoortoqartillugu suliniarnermi aqutsineq
Aammattaaq ajoqusersimasut isumannaatsumik qanoq angallanneqarsinnaanerat, apummik sisoortoqarsimatillugu ajoqusersimasut qanoq nakorsartinneqarsinnaanerat annaassiniarnermilu qamuteralannik qanoq isumannaatsumik atorluaasoqarsinnaanera ilinniartitsissutaassaaq.
Upalungaarsimanerup pitsanngorsarneqarnissaa akeqanngitsuunngilaq, aamma ilinniartitsinissamut atortussanullu nutaanut 1,5 millionit koruunit missingersuutigineqarsimapput.
Qamuteralaat atorneqarnissaminnut naleqqutinngitsut 150.000 koruunit sinnerlugit tuniniarnerini isertitsissutaasinnaasut nalilerneqarpoq.
Kommuneqarfik Sermersuumi Aningaasaqarnermut Ataatsimiititaliap suliaq Sanarfinermut Ataatsimiititaliamit tigussavaa. Kommunalbestyrelsip suliaq akuerissappagu, upalungaarsimasut aappaagu ukiup sisamararterutaani piareersinnaassasoq suliniummut nassuiaammi allassimavoq.
