Aqqalu C. Jerimiassen: Namminiilivinnissatsinnut USA sunniuteqarsinnaavoq – piumagutta

Donald Trump Jr., præsidentinngortussap ernera, maanna Nuummiippoq, tikimmat Jørgen Boassenimit, 50-inik ukiulimmit qaqortumaartumit, tikilluaqquneqarluni.

Tikeraarneq pisortatigoortuunngilaq, takornariaannarlunili tikeraarnerarpoq.

- Ersertitsivoq nunarput soqutigigaat. Ersiutaaginnarpoq nunatta qanoq soqutiginartiginera, taannalu periarfissarpassuarnik takutitsivoq nunatta qanoq periarfissagissaartiginera. Atorluartariaqakkagut periarfissat taama ittut, Aqqalu C. Jerimiassen, Atassutip siulittaasua oqarpoq.

Taassuma ilanngullugu oqaatigaa tikeraarnera iluaqutissartaqartoq atorluarsinnaasatsinnik:

- Aatsaat massakkut danskit naalakkersuisui eqiilertutut pilerput. Aalassaqqapilussuupput. Uanilu kunngeqarfiup iluatungaani inuiaqatigiit innuttaasut naligiinnerusumik inissisimalernissaanut aamma aqqutissamik pilersitsisinnaavoq, soorlu ukiuni arlariinni sorsuutigineqartut politiit akissarsiaat allallu.

Nunatsinnut tikilluaqqusisassaagut

Aqqalu C. Jerimiassen aamma isumaqarpoq nunarput nunanut allanut ammanerusariaqartoq - kinaluunniit kasuttoraluarpat.

Aamma Donald Trump præsidentinngoreerluni nunarput tikinniarluni nalunaaraluarpalluunniit:

-  Akerassarsiussanngilagut, suleqatissarsiussaagut.

- Aamma imaanngilaq Trumpioriarmat sapinngisarput tamaat ajattarlugu piniarsarissagipput. 

Namminiilivinnissatsinnut USA sunneeqataasinnaavoq - piumagutta

Donald Trump Jr.-ip Nuummut tikeraarneranut tunngatillugu Aqqalu C. Jerimiassen aperaarput USA namminiilivinnissatsinnut sunneeqataasinnaanersoq.

Imatullu akivoq:

- Sunniuteqartikkusunneqarpat sunniuteqartinneqassaaq, sunniuteqartikkusunngikkutsigu sunniuteqartissanngilarput.