Illersornissamut isumaqatigiissut Folketingimi akuerineqarpoq
Illersornissamut isumaqatigiissut pillugu Folketingip ataatsimiittarfiani sisamanngornermi ullaakkut taasisoqarpoq. Tamanit akuerineqarpoq.
Qarsoq-Høegh Dam (Naleraq) aamma Naaja H. taasinngitsiarnermi ataatsimiittarfimmiipput.
Assi: Mads Claus Rasmussen/Scanpix
Kalaallit Nunaata, Danmarkip USA-llu akornanni illersornissamut isuamqatigiissut pillugu aalajangiivigisassatut siunnersuut, B 36, Folketingimi sisamanngornermi aappassaaneerneqarlunilu pingajussaaneerneqarmat Folketingip ataatsimiittarfia inoqangaatsiarpoq.
Ilaasortat Kalaallit Nunaanneersut marluk, Qarsoq Høegh-Dam (Naleraq) aamma Naaja H. Nathanielsen (IA) ataatsimiittarfimeeqataapput.
Isumaqatigiissutip taasissutigineqarnerani 109-t isumaqataapput, akerliusoqaranilu taasinngitsoortoqanngilaq. Aamma oqaaseqartoqarumanngilaq, taamaammmat immikkoortup suliarineqarnera 5 minutsit ataallugit suvisussuseqarpoq
- Taama ajornanngitsigisumik suliarineqarnera nuannaarutigaara. Ima paasivara, aappassaaneerinninnermi oqaaseqartoqarpiartanngitsoq, isumaqarpungalu siullermeerinninnermi ataatsimiititaliamilu suliarineqarnerani amerlasuunit isumaqataaffigineqartoq, taamaammat ullumikkut oqallisigineqangaatsiarsimagaluarpat tupaallannarsimassagaluarpoq. Isumaqatigiissutip Inatsiartuni Naalakkersuisunilu akuerineqareersimanissaa Kalaallit Nunaannut pungaaruteqarpoq, Naaja H. Nathanielsen kingorna Sermitiamut oqarpoq.
Qarsoq Høegh-Dam aamma Folketingip ataatsimiittarfiani oqaaseqarusunngilaq.
– Oqaasissakka oqaatigereerpakka. Aamma Kalaallit Nunaata kissaataanut akerliunianngilanga.
Taava maanna nunanut allanut ministerip Lars Løkke Rasmusenip suliassarilerpaa, isumaqatigiissutip pisortatigoortumik Inatsisartuni Folketingimilu akuerineqarsimanera amerikamiut allaffeqarfianut nalunaarutigissallugu.