Lars Løkke: USA-p Kalaallit Nunaanni anguniagai suli erseqqissumik oqaatigineqarsinnaanngillat

Illersornissaq pillugu isumaqatigiissut maanna akuerineqarpoq, USA-llu Kalaallit Nunaanni sulineranut erseqqissunik malittarisassaqarnissaa isumaqatigiissutigineqarpoq. Amerikamiut Narsarsuarmi Mestersvigimiluunniit nutaamik sakkutooqarfiliorsinnaanngillat siumut suliaqaqqaartigatik, qanorpiarli anguniagaqarnersut suli ilisimaneqanngilaq, nunanut allanut ministeri Lars Løkke Rasmussen oqarpoq

- Anguniakkatsinnut apersorneqarsinnaanngitsumik angusimavarput, imaluunniit ikinnerpaamik immikkoortumi ajugaasimavugut, malittarisassaqarnermik tunngaveqarluta aammalu sinaakkuteqarluta, taakku tunngavigalugit oqartussaassuseq pillugu apeqqutit tunngaviusut tamakkerlugit peerneqarlutik aammalu saniatigut Amerikamiut Kalaallit Nunaanni innuttaasut nammineerlutik aalajangiisinnaatitaannerannik akuersinerat qulakkeerneqarluni, naalakkersuisunut allanut ministeri Lars Løkke Rasmussen oqarpoq.
Saqqummersinneqarpoq

Folketingimi partiit illersornissamut isumaqatigiissut pillugu isummerniarlutik Folketingip ataatsimiittarfiani suliaq aappassaaneerneqarmat minutsit tallimat ingerlanerinnaanni sisamanngornermi isummersorput.

Nunanut allanut ministereqarfik USA-mut maanna nalunaarsinnaalerpoq, isumaqatigiissut Inatsisartunit Folketingimillu akuerineqarsimalereertoq.

Suleqatigiinneq aallaqqaataaneerneqarpoq

USA-mik isumaqatigiissut nutaaq tunngavigalugu Kalaallit Nunaat nukittunerulersoq – tatiginninnerli ineriartorteqqinneqartariaqartoq, Nunanut allanut ministeri Lars Løkke Rasmussen (M) Sermitsiamut oqarpoq.

ILLERSUINEQ PILLUGU ISUMAQATIGIISSUT

Illersornissaq pillugu isumaqatigiissut New Yorkimi septembarip 22-ani atsiorneqareersoq, Inatsisartut Folketingillu inaarutaasumik maanna akueraat.

Isumaqatigiissummi Kalaallit Nunaata kisimi oqartussaanera nunallu namminiilivissinnaanera uppernarsarneqaqqippoq, aamma kalaallit inuiaqatigiit inatsisit naapertorlugit namminneq aalajangiisinnaatitaanerat akuerineqarpoq.

Isumaqatigiissut naapertorlugu USA Narsarsuarmi Mestersvigimilu illersornissamut sakkutooqarfimmik pilersitsisinnaavoq, Pituffimmilu sakkutooqarfimmik alliliisinnaalluni.

Sumiiffiit allat toqqarneqarsinnaapput Danmarkip Kalaallit Nunaatalu akuersissuteqarnerisigut.

USA-p aamma rakettinik illersornissamut illersuutaata "Golden Dome“-ip inissinnissaa akuerineqarpoq.

Isumaqatigiissummi aamma allassimavoq naalagaaffiit aningaasaliisullu NATO-mut EU-mulluunniit ilaasortaanngitsut "suliffeqarfinni mianernartorsiorfiusuni“, soorlu attaveqarnermut aatsitassanullu tunngasuni, "pingaartumik sunniuteqarsinnaanngitsut“.

Isumaqatigiissut qaqugu atuukkunnaassanersoq aalajangerneqanngilaq — Kalaallit Nunaat nunatut namminersulissappat, isumannaallisaanermut illersornissamullu isumaqatigiissut suli atuutissaaq, Kalaallit Nunaat NATO-mut ilaasortanngorpat. 

RITZAU/Nunanut allanut ministereqarfik 

– Ajugaanertut anguniagarput anguneqarmat naammagisimaarnarpoq, malittarisassaqalerpugummi tunngaviusunik kiffaanngissuseqarneq pillugu apeqqutinik tamanik peersitsisunik, aamma Kalaallit Nunaata nammineersinnaaneranik Amerikamiut akuerinninnerannik qulakkeerinnittussanik.

– Tatiginninneq annertooq innarlerneqarsimanera isumaqatigilluinnarpara. Aallartinneqaqqilersutut maannakkut isigaara. Tassanngaanniit attaveqaatit pitsanngorsartariaqarpavut: Kalaallit Nunaat-USA, Danmark-USA aamma Kunngeqarfik Danmark USA-mut ataatsimoorluta.

Kalaallit Nunaannut soqutiginninneq tunngaviusoq

Lars Løkke Rasmussen naapertorlugu USA-p Kalaallit Nunaat suli soqutigingaaraa ilisimaarisariaqarparput.

– Tamatta nalunngilarput Amerikamiut Kalaallit Nunaannik soqutiginninnerat suli atuuttoq. Tamanna pitsaasuuvoq, paasisinnaasatsitut Kalaallit Nunaat niuernikkut ammavoq. Soorunamili qanoq ineriartornersoq malinnaaffigissavarput. Amerikamiut sunik anguniagaqarnersut takujumaarparput.

– Maanna isumaqatigiissuteqarpugut USA-p isumannaallisaanikkut pisariaqarsoriguniuk sakkutooqarfimmik pilersitsisinnaaneranik, maannamulli aalajangersimasumik tusarsimanngilagut.

Tassa Mestersvig Narsarsuarlu pillugit USA oqaloqatigiittoqaqqissimanngila?

– Naamik, taamaanngilaq. Isumaqatigiissummi tunngaviusumi ersarilluinnarpoq Amerikamiut aalajangersimanerusumik eqqarsaateqaraangata qanoq pisoqartassanersoq. Taava ataavartumik ataatsimiititaliamut saqqummiunneqassapput, aalajangersimasumik suna suliarineqassanersoq periusissiaqarpoq. Nuannaarutigaara isumaqatigiissut manna 1951-imi isumaqatigiissummit kulturimut, pinngortitamut avatangiisinullu tunngatillugu nukittunerummat, taakkumi isumaqatigiissutoqqami taamanikkut ilaanngillat.

Pitsaanerusumik isumaqatigiissuteqartoqarpoq

Taamaattumik Kalaallit Nunaat siornatigornit maanna pitsaanerusumik inissisimasoraajuk?

– Aap, qularnanngitsumik Kalaallit Nunaat taamaappoq. Naluneqanngilaq Kalaallit Nunaanni aatsitassarsiorfitoqqat ilaanni avatangiisinut suli unammilligassaqartugut, taakkumi malittarisassaqannginnerat pissutigalugu Amerikamiut qimagaaginnarlutik saliinngitsoorsinnaammata. Tamanna isumaqatigiissummi nutaami aaqqipparput.

Maanna qanoq pisoqassava?

– Amerikamiut isumaqatigiissutip periarfissartai qanoq atorluartigissaneraat suli apeqqutaavoq. Nalunngilarpulli tamanna qanoq pissanersoq pillugu malittarisassat aalajangersimasut maanna isumaqatigiissutigineqartut. Narsarsuarmi Mestersvigimiluunniit tassanngaannaq arlaannik pisoqarsinnaavoq siumut suliamik ingerlatsisoqarsimanngikkaangat, Lars Løkke Rasmussen oqarpoq nangillunilu oqarluni ataavartumik ataatsimiititaliap tullianik ataatsimiinnissani decembarimi pissasoq.

– Taava soqutiginartorujussuussaaq Amerikamiut piviusunik isumassarsiaqarnersut, Lars Løkke Rasmussen naggasiivoq.

Powered by Labrador CMS