Aqqusinikkut angallannermut iliuuseqanngippallaarneq attatiinnarneqarsinnaanngilaq

Aqquserngit Nunatsinnit isumagineqalereersut kommuninit isumagineqarput, taakku illoqarfinni nunaqarfinnilu sanaartornermut ingerlatsinermullu akisussaapput. Aqqusinikkulli angallannermut tunngasut angerlaanneqarsimanngillat, tamannalu tamatigut ilungersunartorsiorfiusarluni. Malitassammi inatsisillu amerlaqisut Nunatsinnut tulluanngilluinnartut ulluinnarnilu akornutaasut ilungersunartorsiortitsisarmata. Assersuutigalugu qamuteralannik ingerlatsisinnaanermut ukiut killiliunneqarsimasut, biilinik misissuisoqartalernissaanik periarfissaqarnissaq, biilersinnaanermut allagartamik piumasaqaatinik immikkut ittumik atuutsitsisoqarsinnaanissaa aamma biilit naqitsinerat oqimaassusiallu pillugit malittarisassat allanngortinneqarnissaat, maannalu kingullertut taxanut inatsit atuutilerpoq, tassanilu nalunaarummik pisariaqartitsisoqarluni, inatsisit naapertorlugit ingerlatsisoqarsinnaaqqullugu.

Inatsisit amigaataasut

Taxartartut arlallit akuersissutaatillit, apriilimi akerliussutsimik takutitsipput, pineqartumut inatsisinik amigaateqartoqarnera erseqqissarneqarluni, tamatumami kinguneranik kinaluunniit biilersinnaanermut allagartaqartoq, biilimik ingerlatsisinnaanermut allagartaqarnini pissutigalugu taxartartuusinnaammat.

Taxaatileqatigiit akuersissutaatillit akuersissuteqaratik taxartartunik politiinut unnerluutiginnipput. Ullumikkulli inatsisit naapertorlugit inunnik, naak akuersissuteqanngikkaluarlutik taxartartunik unnerluutiginnittoqarsinnaanngilaq.

Ineqarnermut attaveqaasersuutinullu naalakkersuisoq Hans Peter Poulsen (Siumut) arlaleriarluni angallannermut ministerimut Thomas Danielsenimut (Venstre) saaffiginnittarpoq, politiit nalunaarutaannik, siuliisa imarisaattut ittumik atuutilersitsinissaanik qinnuigalugu, nalunaarutimmi siusinnerusumeersut, Angallannermut Aqutsisoqarfimmit atuukkunnaareersutut oqaatigineqarmata. Siunertaavorli inatsisit naapertorlugit piaartumik ingerlatsisoqalernissaa.

Attanneqarsinnaanngitsoq

Hans Peter Poulsen Sermitsiamut allappoq, angallannermut ministeri juunip 26-anni ataatsimeeqatigigini, tassanilu ilaatigut taxanut tunngasut oqallisigineqarlutik.

 “Aqqusinermi angallannermut tunngasut, tamatumani ilanngullugu taxanut malittarisassaliornerit, paamaarunneqarnerat attatiinnarneqarsinnaanngitsoq erseqqissarpara. Thomas Danielsenip aamma oqaatigaa, tamatumani iliuuseqartoqarnerunissaa kissaatigalugu. Tamatumunnga atatillugu tamatuma qulakkeerneqarnissaa oqaloqatigiissutigaarput.”

Inatsisinik atuutitsinermut ministereqarfiup suliaq kinguarsaraa

Tamatuma kingorna Ineqarnermut Attaveqaasersuutinullu Naalakkersuisoqarfimmit ilisimatitsissutigineqarpoq, Inatsisinik atuutitsinermut ministereqarfik oqaloqatigineqartoq taxanut nalunaarusiami suliassat ilaat kia akisussaaffigissanerai oqaloqatigiissutigineqarluni.

“Oqaloqatigiinneq tamanna kinguaattoortitsisutut ippoq.”

Hans Peter Poulsenilli neriuutigaa “ministeriaqarfiit pineqartut akisussaaffimmik agguataarinermikkut paatsuugassaanngitsumik aaqqiissuteqassasut”.

Naalagaaffiup oqartussaasui oqartussaaffimminnik agguataarnissaannut tunngatillugu Naalakkersuisut oqartussaassuseqarneq ajorput.

Allaaserisaq Motoorimi saqqummersinneqarpoq. Motoori uani atuarneqarsinnaavoq.