Arctic Circle Road nunani allani soqutigineqaqaaq
Sisimiut Kangerlussuarlu Nunatsinni siullersaallutik aqqusinermik imminut atassuteqalissasut, Arctic Circle Business tusagassiuutitigut nalunaaruteqarpoq.
Qeqqata Kommune
Sisimiut Kangerlussuullu akornanni ATV-nut aqqut soqutigineqaqaaq, taama Arctic Circle Business tusagassiuutitigut nalunaaruteqarluni allappoq.
Aqqut 200 kilometeringajannik takissuseqassaaq, Nunatsinnilu nunatat annersaani periarfissanik nutaanik ammaassissaaq. Aqqut Arctic Circle Trail aamma UNESCO-p nunarsuarmi kingornussassatut allattorsimaffianut ilaasoq malillugu, sermersuarmiit sinerissamut aqqutaavoq.
- Tamanna suliniut annertooq Islandimi Arctic Circle Assemblymi, Arctic Circle Businessimit aaqqissuunneqartumik sammineqarluni saqqummiunneqarpoq. Tassani Arctic DTU-mit, Visit Greenlandimit Qeqqatalu Kommunianit aallartitat saqqummiussipput, Arctic Circle Businessip pisortaa, Jesper Schrøder allappoq nangillunilu:
- Saqqummiinermi eqqartorpaat sooq maannakkut suliniut tamanna ingerlanneqarnersoq aamma takornariaqarnermut, ilisimatusarnermut inuiaqatigiinnullu qanoq sunniuteqassanersoq. Peqataasut nunani allaneersut aqqutip tamatuma Kalaallit Nunaata pinngortitaanik pisuussutinillu qanoq pissarsiffigiuminartinnerusinnaanera ineriartornissamullu periarfissanik nutaanik pilersitsisinnaanera pillugu isumaminnik soqutiginnilluarlutik avitseqatigiipput.
