Unaaq Jettimelu Kangerlussuarmut aappaagu timmisartuussisassapput

Air Greenland Albatros Arctic Circlelu isumaqatigiissuteqaqqipput, taamaalilluni Københavnip Kangerlussuullu akornanni toqqaannartumik ukiut pingajussaani timmisartuussisoqartassaaq. Jettimemi Air Greenlandillu timmisartua nutaaq Unaaq marsimiit oktobarimut aqqummi tassani timmisartuussisassapput. Air Greenland tusagassiorfinnut taama nalunaaruteqarpoq. Toqqaannartumik timmisartuussisoqaqqittussanngornera Albatros Arctic Circlep pisortaata nuannaarutigaa.

Københavnimit Kangerlussuarmut toqqaannartumik aappaagu 2027-mi marsip 16-ianiit oktobarip 26-ata tungaanut timmisartuussisoqartassaaq.

Assiliisoq: Jørgen Larsen

Arnaq Nielsen Arnaq Nielsen Tusagassiortoq

Saqqummersinneqarpoq 4. Novembari 2026 - 10:45

Ussassaarut

Kangerlussuaq takornariarusunneqartuarsinnarpoq. Taamaattumik Air Greenland Albatros Arctic Circlelu Københavnip Kangerlussuullu akornanni toqqaannartumik timmisartuussisoqartarnissaa ukiut pingajussaanni isumaqatigiissutigaat.

Isumaqatigiissut nutaaq 2027-mut atuuppoq. Aqqummi tassani marlunngornerit tamaasa marsip 16-ianiit oktobarip 26-anut timmisartuussisoqartassaaq. Københavnip Kangerlussuullu akornanni toqqaannartumik timmisartuussineq 2025-mi aallartinneqarpoq 2026-milu ingerlaqqilluni. Isumaqatigiissuteqartoqaqqinneratigut 2027-mi timmisartuussisoqartarnera ingerlaannassaaq. Air Greenland tusagassiorfinnut taama nalunaaruteqarpoq.

Isumaqatigiissuteqaqqinneq Albatros Arctic Circlemi pisortap Jørgen Larsenip nuannaarutigaa, taassuma oqarnera malillugu sumiiffimmi takornariaqarnermut siuarsaanermut iluaqutaassaaq.

- Tamanna sumiiffimmi takornariaqarnermik ineriartortitsinissamik, aammalu tikeraatta Kalaallit Nunaanni misigisinnaasannik tamanik misigisaqartinnissaannik ajornannginnerulersitsinissamik takorluugaqarnitsinnut alloriarneruvoq pingaarutilik, Jørgen Larsen oqarpoq.

Allanut ingerlaqqittoqarsinnaassaaq

Københavnip Kangerlussuullu akornanni timmisartuussisoqarnerata saniatigut illoqarfinnut allanut ingerlaqqittoqarsinnaasassaaq. Kangerlussuarmiimmi Ilulissanut, Nuummut Sisimiunullu ingerlaqqittoqarsinnaanera ilanngullugu isumaqatigiissutigineqarami.

Ussassaarut

Sulinngiffeqarlutik angalasut umiarsuarnullu takornariartaatinut ilaasut nunatta ilaanukartarsinnaanerat taamaaliornikkut siunertarineqarluni.

- Angalanissanut pilersaarummi nutaami Københavnimut toqqaannartumik angallassisinnaaneq, nunami namminermi angallavitsinnut atassuteqartoq atorsinnaalerparput. Taamaalilluni sullitagut Kangerlussuup aamma Kalaallit Nunaata immikkoortuisa allat akornanni angalanissamut amerlanerusunik periarfissaqalerput, Air Greenlandimi niuernermut pisortaq Chris Shern oqarpoq.