Kommune Qeqertaliup illoqarfiini nunaqarfiinilu sanaartugassat aningaasartaaruttut 40-it sinneqarput. Kommunip ingerlatsinermi missingersuutini, nammineq akuerisani, malissinnaanngimmagit allattoqarfik qinikkat oktobarip 21-ani ataatsimiinnissaannut missingersuutit 56,4 millionit koruuninik qaffannissaannik inassuteqarpoq.
Kommunalbestyrelsimi qinikkat suliaq suliarigamikku aningaasat qanoq pissarsiarissanerlugit aalajangerpaat. Aningaasat 64,2 millionit koruunit sanaartugassanut aningaasaateqarfimmiittut ingerlatsinermi amigaatinut matussusiunneqarlutik sanaartornernut atorneqanngiinnarnissaat qinikkat tamarmiullutik aalajangerpaat. Tamanna oqittuinnaananilu iluaqutitaqartoq, borgmesteri Sermitsiamut oqarpoq.
Kommune Qeqertaliup illoqarfiini nunaqarfiinilu sanaartugassat aningaasartaaruttut 40-it sinneqarput. Kommunip ingerlatsinermi missingersuutini, nammineq akuerisani, malissinnaanngimmagit allattoqarfik qinikkat oktobarip 21-ani ataatsimiinnissaannut missingersuutit 56,4 millionit koruuninik qaffannissaannik inassuteqarpoq.
Kommune Qeqertalimmi sanaartugassat aningaasartaaruttut:
Attaveqaasersuutit pillugit suliniutit mikisut
Nunagissaaneq
Aasiaat – Krani
Attu – Umiatsialerivik
Kalaalimineerniarfiit aserfallatsaalineri
Umiarsualivigissaanerit
Qeqertannguami torersaaneq
Aasiaat – Asfalterineq
Kangaatsiaq – Asfalterinissamut piareersarneq
Ikerasaarsuk – Aqqusinernik iluarsaassineq
Ikamiut – Aqqusinernik iluarsaassineq
Qasigiannguit – Asfalterineq
Aqqusinermi qulliit Qasigiannguit
Qasigiannguit Iginngallu akornanni ATV-nut aqqut
Nunaqarfinni iluarsartuussinerit. Aqquserngit, ikaartarfiit, majuartarfiit tummeqqat assigisaallu
Asfaltiliuummik pisineq
Qeqertarsuaq – Ikaartarfiup allilerneqarnera
Aasiaat – Iliveqarfik
Qeqertarsuaq – Iliveqarfik
Qeqertarsuaq – Inissialiorneq
Aasiaat – Illoqarfiup bussii
Aserfallatsaaliinermut aningaasat
Qeqertarsuarmi meeqqerivik
Kangaatsiaq – meeqqerivik
Niaqornaarsuk meeqqerivik
Ikamiut – meeqqat illuat
Attu – meeqqat illuat
Kangaatsiaq – atuarfik
Aasiaanni utoqqaat illuat
Qeqertarsuarmi utoqqaat illuanik alliliineq
Kangaatsiami utoqqaat illuanik alliliineq
Qeqertarsuarmi atuareernerup kingorna ornittagassap pilersaarusiorneqarnera
Qeqertarsuarmi majuartaat
Qeqertarsuarmi ivigaasaaqqanik arsaattarfik
Naluttarfik (misissueqqaarneq)
Qasigiannguani timersortarfiup natiata aserfallatsaalineqarnera
Ikamiuni arsaaffeeraq
Niaqornaarsummi arsaaffeeraq
Aasianni pinnguartarfiit
Aasianni fritidsklubbi
Qasigiannguit B-4-mik aserfallatsaaliineq
Aasiaat "Qagse"
Tusarfik: Kommune Qeqertalik.
Kommunalbestyrelsimi qinikkat suliaq suliarigamikku aningaasat qanoq pissarsiarissanerlugit aalajangerpaat. Aningaasat 64,2 millionit koruunit sanaartugassanut aningaasaateqarfimmiittut ingerlatsinermi amigaatinut matussusiunneqarlutik sanaartornernut atorneqanngiinnarnissaat qinikkat tamarmiullutik aalajangerpaat. Tamanna oqittuinnaananilu iluaqutitaqartoq, borgmesteri Sermitsiamut oqarpoq.
- Sanaartorneq kommunitsinni suliassaqartitsisarmat taamatut aalajangerneq oqittuinnaanngilaq. Kisianni iluaqutitaa tassaavoq suli aallartissimanngitsut peerneqarnerat.
- Aalajangerneq toqqissisimanarivara, kommunalbestyrelsi tamarmiusoq akisussaaffimmik tigusimmat, Simigaq Heilmann (D) oqarpoq.
Suliniutit naammassineqareersut ilaat aningaasartaaruttut
Sermitsiaq sanaartugassat suut aningaasartaarunnersut pillugit, Kommune Qeqertalimmut oktobarip 21-ani attaveqarpoq. Kommunip sanaartugassat suut aningaasartaarunnersut oktobarip 30-ani ilisimatitsissutigai. Taakkuali ilaat sanaartorlugit naammassineqarsimasut, borgmesteri oqartoq, allattoqarfik Sermitsiamut allappoq.
Sermitsiap borgmesterimik marlunngornermi ullaap tungaani oqaloqateqarnermini, sanaartugassat aningaasartaaruttut suut naammassineqareersimanersut apeqqutigai.
Borgmesterilli piffissami tassani taakkua immikkoortissinnaanngilai. Allattorsimaffimmi sanaartugassanut suli aallartinneqanngitsunut aammalu allattorsimaffik sanaartugassanut naammassereersunut tunngasoq aatsaat pissarsiareqqammerini tunngavilersuutigaa.
Qeqertarsuarmi ikaartarfik sanaartukkanut aningaasartaaruttunut ilaasoq maluginiagassaavoq. Ikaartarfimmi aggutsimi naammassineqarluni atulereertoq, Sermitsiap septembari qiteqqutilersoq allaaseraa. Soorli sanaartugassanut aningaasartaaruttut ilaanersoq Sermitsiap borgmesterimut apeqqutigaa.
Borgmesterip nassuiaataa imaappoq, ikaartarfiliorneq 900.000 koruuninik aningaasalerneqarsimasoq, piareerluni sanaartorneqarnerani aningaasat tamakkiisumik atorneqanngimmata, taakkua sinneruttut ingerlatsinermut atugassanngorlugit nuunneqartut.
Kommunip iluani illoqarfinni nunaqarfinnilu najugaqartut sanaartortoqartussaajunnaarallarnera pillugu qanoq oqaasissaqarfigaagit?
- Suliniutit suli aallartissimanngitsut peerpagut. Kisianni missingersuusiorfiup nalaaniippugut, taamaattumik pinngitsoorata sanaartugassanik aningaasaliisussaavugut. Taamaammat suna tamarmi univissunngilaq, Simigaq Heilmann oqarpoq.
Borgmesteri: Allaffissorneq piffissartornarsimaqaaq
Kommunip ukiup sisamararterutaani siullermi aningaasaqarnikkut aqutsinerata nalunaarusiorfigineqarnerani, missingersuutinik sippuineq 18,1 millionit koruunimiittoq qinikkat upernaaq paasivaat. Tamanna pitsaasumut ingerlanani ukiup ingerlanerani ajorsiartuinnavippoq. Naggataani 60 millionit tungaanut ingerlalermat aaqqiissutissamik nassaartoqarpoq.
Sooruna upernaarli killiffissi sumut ingerlanersoq nalunngereerlugu, sakkortuumik, maannakkut iliuuseqarnissitut, iliuuseqarsimanngitsusi?
- Isumaqartoqarsinnaavoq iliuuseqanngitsugut. Kisianni aamma piffissaq pisariaqartissimavarput saqqummiussaqarnissatsinnut tamakkiisumik. Allaffissornikkut sulineq piffissarujussuarmik tigusisimavoq, Simigaq Heilmann oqarpoq.
Taassuma allaffissornikkut piffissamik atorfissaqartitsisoqarsimagaluartoq sanaartugassarpassuit aningaasartaarunnerat kimit akisussaaffigineqarnersoq nalornisiginngilaa.
- Borgmesteri taannaavoq akisussaanerpaarpaasoq. Uanga aallartinninniilli unneqarinneq pingaartinnerpaavara, Simigaq Heilmann oqarpoq.
Siunissamut ernumasoq
Kommunimi missingersuutit sipporneqarnerannut aningaasat naammattussanngoraluartut, sanaartugassarpassuit kommunimi aningaasartaarunneqarnerat borgmesterimut siunissaq eqqarsaatigalugu toqqissisimanngissutaavoq.
- Siunissaq ornitarput ermungaara. Ineriartortitsinissaq eqqarsaatigalugu sanaartornikkut periarfissat pitsaanngimmata, Simigaq Heilmann oqarpoq.
Sanaartugassat aningaasartaaruttut peerneqarput. Sanaartugassalli aallartinneqareersut aningaasartaasa ingerlatsinermut nuunneqannginnissaat qinikkat aalajangerpaat. Sanaartugassat aallartinneqareersut suut pineqarnersut, Sermitsiap Kommune Qeqertalimmut paasiniarpaa. Taakkua arfineq-marluupput. Kangaatsiami arsaaffik, Qasigiannguani inissiat arfinillit, Torsukattammi illuaraq, Kangaatsiami eqqaavissuup imaarnissaa, Kitsissuarsunni aqqusineq, atuarfiit iluarsartuunneqarnissaanut aningaasat kiisalu upalungaarsimanermut aninagasat.
