Ataatsimiititaliaq: Suila-tapit akissarsiffimmi tunniunneqartalerlik

Suila-tapit oqallisaajuarsinnarput. 

Tamatumuuna sapaatip-akunnerata qeqqinnaani tunniunneqartarnerat allanngortinneqartariaqartoq Inatsisartuni kukkunersiuinermut ataatsimiititaliap Naalakkersuisunut kaammattuugigaa. 

Suila-tapisisoqarsimatillugu suliartunngitsoortoqartarnera ajornartorsiutaasoq ataatsimiititaliap maluginiarpaa. Taamaammallu Naalakkersuisunut kaammattuipput. 

- Maluginiarsimavarput namminersortut aammattaaq suliffeqarfinni aqutsisut oqariartuuteqartartut Suilasinermi sulinngitsoortoqartartoq. Taakku paasisinnaavagut, taamaattumik ataatsimiititaliaq isumaqatigiittoq kaammattuivoq Suila-tapit tallimanngornermi nakkartalissasut, Inatsisartuni kukkunersiuinermut ataatsimiititaliami siulittaasoq Nivi Rosing oqarpoq.

Isuma nutaajunngilaq  

Suila-tapit qaammammi marlunngornerit pingajuanni tunniunneqartarnerata nuunneqarnissaa, Inatsisartunut ilaasortap Margrethe Thårup Andersenip (D), Sermitsiamut siusinnerusukkut isumaliutersuutigereernikuuaa.

AAMMA ATUARUK

Margrethe Thårup Andersen: Suila-tapisisoqarsimatillugu suliartunngitsoortorpassuusarput

Suila-tapisisoqartillugu suliartunngitsoortorpassuusartut ajornartorsiutaanerat tunngavilersuutigalugu. 

- Ima ilungersunartigisarpoq ilaanni aalisakkerivinni sulisussaaleqisoqalertarluni, taamatuttaarlu allanik aamma oqariartortoqarnikuuvoq ajornartorsiuteqartarlutik. Utoqqaat illuini sulisussaaleqisarneq ilaatigut aamma Suila-tapisereernerup kingorna pisartoq assut isornartorsiorneqarpoq. Angajoqqaanillu aamma oqariartorfigineqarnikuuvunga ilaatigut meerartik aaginnartariaqartarlugu, tamannalu nalaatsornerinnakkut taanna Suila-tapisiffiit nalaanni pisartoq, Margrethe Thårup Andersen taamani oqarpoq.