Arfannianut akerliusoq nunatsinni isertitsivimmiiginnarallassaaq
Kalaallit Nunaata Eqqartuussiviata aalajangiussaareersoq attatiinnarpaa, Paul Watsonillu tigummigallarneqarnera novembarip 13-ata tungaanut atuutsillugu.
Paul Watson marlunngornermi oktobarip 23-ani eqqartuussivimmut tikippoq.
Assiliisoq: Leiff Josefsen
Kalaallit Nunaanni Eqqartuussiviup ataasinngornermi arfanniarnermut akerliusoq Paul Watson ulluni 98-ini tigummigallarneqareerluni iperagaaqqunngilaa. Watsonip eqqartuussissuserisuisa ilaat Ritzauimut taama ilisimatitsivoq.
Paul Watsonip sapaatip-akunnerani kingullermi Kalaallit Nunaanni Eqqartuussiviup novembarip 13-iata tungaanut tigummigallarneqarnissaanik aalajangiinera suliareqqitassanngortippaa.
Eqqartuussissuserisorli Julie Stage ilisimatitsivoq Nunatta Eqqartuussiviata aalajangerneq atortussanngortissimagaa.
Nuummi politiit juulip 21-ani umiarsuarmut ikimmata Watson tigusarineqarpoq, tigummigallarneqalerlunilu. Taassuma Japanimi pinerluuteqarsimasutut eqqartuussaaneqarnissaa kissaatigineqarpoq.
Inatsisinik atortitsinermut ministereqarfiup Japanip piumasaa akuerissanerlugu isumaliutigaat.
Nunarsuaq tamakkerlugu tamanna akerliussutsimik takutitsinernik kinguneqarpoq, Frankrigillu præsidentiata Danmark kajumissaarpaa nakkaannaqqunagu.
/ritzau/
