Arfernik illersuiniaq Paul Watson Frankrigimi qimaasutut illersukkatut akuerineqanngitsoq
Frankrigip Paul Watson, Japanip tigusarinninnissamut peqqussutaa pissutigalugu Kalaallit Nunaanni parnaarussaasimasoq, qimaasinnaanermik itigartippaa.
Paul Watson qaammatit sisamat sinnerlugit Nuummi pineqaatissinneqarsimasunut inissiisarfimmiittussanngorlugu tigummigallarneqarpoq, Japanimullu tunniunneqassanngitsoq Danmarkimi inatsisinik atortitsinermut ministereqarfiup decembarimi aalajangerpaa.
Assi: Leiff Josefsen
Arfernik illersuisoq Paul Watson, USA-mut Canadamulluunniit uteruni Japanimi eqqartuunneqarnissaminut aarlerisoq, Frankrigip qimarngunissaanut itigartippaa.
Watsonip aarlerinera tunngavissaqanngitsoq Ofpra, Frankrigimi qimarngunissamut qinnuteqartunut oqartussaasoq, isumaqarpoq. AFP taama allappoq.
74-inik ukiulik Watson, Amerikamiuullunilu Canadami innuttaassuseqartoq, Ofprap aalajangiinera pakatsissutigalugu AFP-mut oqarpoq.
Nuummi tigusatut misigisimavunga
Watson Japanimi tigusarinninnissamut peqqussut tunngavigalugu siorna juulimi Kalaallit Nunaanni tigusarineqarpoq.
Qaammatini sisamani Nuummi parnaarussivimmiittussanngorlugu tigummigallarneqarpoq, Japanimullu tunniunneqassanngitsoq Danmarkimi inatsisinik atortitsinermut ministereqarfiup decembarimilu aalajangerpaa.
Watson tigusaannginnermini nuliani erninilu marluk ilagalugit Frankrigimi najugaqarsimavoq.
Japanimi tigusarineqarnissaanik peqqussut pissutigalugu Paul Watson suli navianartorsiortoq Watsonip eqqartuussissuserisua Emmanuel Ludot oqarpoq.
Itigartitaanini pakatsissutigigaa
Taassuma taamaammat Ofrap politikkikkut qimaasutut itigartimmani pakatsissutigaa.
- Frankrigip Paul Watson politikkikkut qimaasutut itigartikkamiuk ataqqinaatiginngilaa, Emmanuel Ludot AFP-mut oqarpoq.
- Japanip nunani tamalaani tigusarinninnissamut peqqussutini attatiinnarpaa, taamaammat sumulluunniit aallaraluaruni suli navianartorsiussaaq, taanna nangippoq.
Japanip Watsonillu akornanni suliaq 2010-mi aallartippoq, Japanimi oqartussat naapertorlugit Watsonip umiarsuaq arfanniut ajoqusersorlugulu arfanniat sulinerini akornusersorsimavai.
Watsonip tunniunneqarnissaa Japanip suli kissaatigigaa
Politiit suleqatigiit Interpolikkut Watson pillugu "tigusarinneqqussut" juulimi atorunnaarsippaat, taamaalillutillu politiit nunarsuaq tamakkerlugu taassuma tigusarineqarnissaanik kajumissaarneqarunnaarput.
Interpol taama aalajangeraluartoq Japanip Watsonip tunniunneqarnissaa suli kissaatigigaa Japanimi naalakkersuisut juulip 23-ani nalunaarput. Oqaaseqartartoq juulip 23-ani taama nalunaarpoq.
- Atorunnaarsitsineq Japanimiunit tigusarinneqqussutip atuunneranut allannguutaanngilaq.
- Taassuma tunniunneqarnissaanut akuliuttut tamaasa qinnuigiuassallugit aalajangiusimavarput, oqaaseqartartoq Yoshimasa Hayashi oqarpoq.
/ritzau/
