INNAALLAGIAARUNNEQ
Arfininngorneq allaanerusoq
Inuiaqatigiit pisariaqartitsimmata suliffeqarfiit ikiuiniapallapput.
Arfininngormat innaallagiaarunnera suliffeqarfinnut ulapaartitsivoq.
Assi nammineq pigisaq
- Innaallagiaarunnera pissutaalluni arfininngorneq ilimagisamiit allaaneroqaaq.
Aatsitassarsiornermik ingerlatsisut nunami tammaarsimaarfissaannik ilaatigut suliaqartartut Xploration Services Greenland A/S-ip pisortaata inuussutissarsiortup Martin Sandy Shalmip oqaatigaa. Tammaarsimaarfiit innaallagiaqarfiusunut ungasissumiikkajuttarput.
- Niels Meinel, sanaartornermik ingerlatsivimmit GNC-meersoq, aqqutigalugu Upalungaarsimasunit Nuussuup timersortarfianni, Kangillinnguit timersortarfianni aamma Hans Lyngep timersortarfiani innaallagissamik, kialaarfissamik qaammaqqutinillu pisariaqartitsinermi pilersuisinnaanersugut aperineqarpunga, Martin Sandy Shalmi oqarpoq.
Itigartitsissanngilagut
- Soorunami akueraarput, naak arfininngornermi alianaarsaarujooqatigiinnissamut pilersaarnikuugaluarluta. Inuiaqatigiit ikiorneqartariaqartillugit itigartitsisoqarneq ajorpoq.
- Ilimagisimanngikkaluarparput, atortorissaaruteqarpugulli sulisussaqarlutalu, aamma inuit eqqortut suleqatigitillugit angusaqarluartoqarsinnaavoq.
Inuussutissarsiortoq Martin Sandy Shalmi aatsitassarsioqatigiiffiit misissuinissaannut nunami tammaarsimaarfissaannik ikiuuttartuni Xploration Services Greenland A/S-imi ilaatigut pisortaavoq. Suliffeqarfimmi tassani sulisut Nuummi arfininngormat innaallagiaarunnerani sullissipput.
Namminersortoq assiliisoq
- Akunnerit sisamat ingerlanerinnaanni Frederikshåb Betoncentral ApS (Shalmip suliffeqarfiutaa alla, aaqq.), Arssarnerit aamma GNC suleqatigalugit timersortarfiit pisariaqartitsisunut kialaarfissat piareerpavut, taamaalilluni inuit angerlarsimaffimminni kissartoqanngitsut ornigassaqalerput.
- Xploration Servicesimi sulisut pingasut, Frederikshåb Betoncentralimi sulisoq ataaseq, Arssarnerni sulisut sisamat aamma GNC-mi sulisut sisamat suleqataapput. Sulisut suleqatigisartakkavullu qutsavigerusuppakka suut tamaasa alaannarlugit innuttaasunut ikiuummata, Martin Sandy Shalmi oqarpoq.
