Arktisk Kommandop umiarsuaatai angalaqqilissasut

Umiarsuit nakkutilliissutit marluk, Lauge Koch aamma Ejnar Mikkelsen, avalaqqissinnaanngorput. Arktisk Kommando Facebookimini taama nalunaarpoq. Umiarsuit piffissami sivitsortumi teknikkikkut ajornartorsiuteqareerlutik maanna iluarsineqarsimapput.

- Piffissaq sivisooq Issittumi Sakkutooqarfik suleqatigisartakkallu umiarsuit alapernaarsuutit ajornartorsiutaannik aaqqiiniarlutik ulapissimapput maannalu imaani angalallutik suliassanik ingerlatitseqqilersinnaanerat nuannaarutigaarput. 

- Iluarsaassinerup nalaani sivisuumik Nuummissimaneq inuttat eqqugaasunut annertuumik piumasaqaateqarsimavoq. Allanngorartumi sulisinnaanermik qujamasuutigisatsinnik inuttat takutitsisimapput, Arktisk Kommandomi kommandørkaptajn Brian Jensen oqarpoq.

Avalassinnaanngortut

- Sikuki Nuuk Harbour paasinnilluarlutik suleqatigiilluarnermullu immikkut qujassuteqarfigerusuppakka. Sumiiffimmi iluarsaasseqataasimasut suleqatigullu soorlu Forsvarsministeriets Materiel- og Indkøbsstyrelse ulapissimanerinnut qujassuteqarfigerusuppaguttaaq. Maanna imarsiortut tamarmik angalaqqilerneri nuannaarutigaara, kommandørkaptajni oqarpoq.

Februaari qiteqquttoq umiarsuit alapernaarsuutit teknikkikkut ajornartorsiuteqalersimapput tamannalu umiarsualivimmiittariaqarnerinik isumaqarsimavoq. Kinguneratut umiarsuaq Hvidbjørnen angalaffissaa Savalimmiuninngaanniit Kalaallit Nunaannut Issittumi Sakkutooqarfimmi pisortap, generalmajori Søren Andersen allanngortippaa.