KL

DK

Assigiinngisitsinermut sorsuttuartut

Atorfilittut soraarnerussutisiaqartup William Kriegelip Inatsisartunut aalajangiiffigisassatut siunnersuutigineqartup, Danmarkimi Nunatsinnilu atorfilittut soraarnerussutisiaqartut assigiimmik soraarnerussutisiaqalernissaannik siunertalik, pissangalluni utaqqivaa

Nunatsinni Danmarkimilu atorfillit soraarnerussutisiaasa naligiissitaasinnaanerannik misissuinissamik nalunaarusiaq pillugu aalajangiiffigisassatut siunnersuut Inatsisartut oqaluuserissavaat. - Isumaqarpunga atorfillit soraarnerussutisiaat naligiissitaasariaqartut, atorfilittut soraarnerussutisialik William Kriegel oqarpoq.
Oline Inuusuttoq Olsen
tusagassiortoq
Offentliggjort

William Kriegel, IMAK sinnerlugu Nunatsinni Danmarkimilu atorfillit soraarnerussutisiaqalernerminni atugaasa pitsanngorsarneqarnissaannik kissaateqartutut misissuinermut peqataasup, Peter Olsenip (IA) aalajangiiffigisassatut siunnersuutaata Inatsisartuni oqaluuserineqarnissaa pissanngatigaa.

Naalakkersuisut nassuiaammik suliaqarnissaannik piumaffigineqarnissaat siunnersuutigineqarpoq, tamatumani Danmarkimi Nunatsinnilu atorfillit soraarnerussutisiaasa assigiinngissutaasa naligiilersinneqarsinnaanersut misissorneqassalluni.

William Kriegelip kinguaariinni peqataaffigisaani taamanikkut sumi inunngorsimaneq najoqqutaralugu akissarsiaqartitsinermut aaqqissuussinermi assigiinngitsunik akissarsiaqartitsinermut akerlilersuineq atuuppoq, tamannalu atorfillit soraarnerussutisiaqartitaanerannut tunngatillugu suli atuulluni.

- Isumaqarpunga atorfillit soraarnerussutisiaat assigiilersinneqartariaqartut. Meeqqat atuarfianni taamanikkut ilinniartitsisutut sulitillunga assigiimmik akissarsiaqartitaanissarput sorsuutigivarput. 

-  Ilinniartitsisut Danmarkimit tikisinneqartartut kalaallinit ilinniartitsisunit taamanikkut akissarsiaqarnerupput. 

-1980-ikkut aallartinneranni tunngaviusumik akissarsiaat 1.000 koruuninik qaffasinnerupput, ukiullu tamaasa sulinngiffeqarnerminnut atatillugu akiliunneqarlutik angalasinnaatitaallutik, sulinngiffeqarnerminnilu angalanerminni aamma 200 kiilunik nassataqarsinnaatitaallutik, aamma qanoq sivisutigisumik sulisimanertik tunngavigalugit bonusinik katersanik aaqqissuussiffigineqartarput, soraarnerminnilu aningaasatigut iluaqutigisaminnik pissarsisarlutik. Ukiorpassuarni sulisimagunik aningaasarpassuarnik pissarsisarput, William Kriegel oqarpoq. 

Taanna nassuiaavoq qallunaat kalaallillu ilinniartitsisut sumi inunngorsimanertik tunngavigalugu akissarsiaasa assigiinngissuteqarnerat ilinniartitsisut kalaallit sumi inunngorsimanertik tunngavigalugu akissarsiaqartitaanerminnut assigiinngisitsinermut akerlilersuinertik sorsuutigisimavaat peqatigiiffiliorlutillu, kingusinnerusukkullu IMAK pilersinneqarluni.

Akissarsianik assigiinngisitsinermut akerliulluni iliuuseqarneq

- Akissarsiat naligiinnissaat anguniarlugu peqatigiiffiliorpugut, assigiimmillu akissarsiaqalernissarput anguarput. Peqatigiiffiit marluk kalaallit qallunaallu ilinniartitsisut peqatigiiffigisimasaat peqatigiiffimmut ataatsimut kattunneqarput, IMAK-ilu pilersinneqarluni. 

-Taamanimiilli kalaallit qallunaallu ilinniartitsisut Nunatsinni naligiimmik akissarsiaqarnerat anguneqarpoq. Danmarkimili akissarsianut soraarnerussutisianullu sanilliullugit assigiinngissuteqartoqaraangat, maani Nunatsinni iliuuuseqarfigineqarneq ajorpoq, soraarnerussutisiaqalernitsinnilu atorfilittut soraarnerussutisiaqalernermi assigiinngissutit annertusiartuinnarput, tamannalu isornartorsiorsimavarput, William Kriegel oqarpoq.

Aaqqiissutissatut siunnersuuterpassuit

Nunatsinni Danmarkimilu atorfillit soraarnerussutisiaasa assigiinngissutaat aaqqinneqarsinnaasoq William Kriegel isumaqarpoq, soorlu Nunatsinni atorfillit soraarnerussutisiaannut tapiliummik U-65-imik atuutilersitsisoqarpat, taamatut Danmarkimi atorfillit soraarnerussutisiallit Danmarkimi naalakkersuisunit tapiiffigineqartartut.

- Atorfilik 60-it 67-illu akornanni ukiulik soraarnerussutisiaqartussatut akueraat, U-65-imillu tapiissutisiaqartarput, tapiissutigineqartartorlu tamanna Nunatsinni atuutinngilaq. Tamannalu assigiinngissuteqarnerannut pissutaanerpaavoq. 

- Tamatuma saniatigut Nunatsinni akissarsiat qaffakkiartortarnerat Danmarkimit appasinneruvoq, tamatuma saniatigut Danmarkimi atorfillit soraarnerussutisiaat ukiut tamaasa nalimmassarneqartarpoq, ilaannikkullu ukiup ataatsip ingerlanerani marloriarluni tamanna pisarluni. Nunatsinni atorfillit soraarnerussutisiaat taama iliorneqarneq ajorput, William Kriegel oqarpoq, taassumalu Inatsisartut aalajangiinissaat qilanaaraa.

soraarnerussutissiat tjenestemandit atugaat samfund inuiaqatigiit

ATORFIIT Se alle jobs

Powered by Labrador CMS