Assit takukkit: Juullimut inuulluaqqusisuni aatsaat taama amerlatigisut peqataapput
Vejlemi juullerpalaarneq, illarneq, erinarsorneq, qitinneq nalliuttorsiornerlu
Erinarsoqatigiit arlaleriarlutik tusarnaartitsipput.
Assiliisoq: Jesper Hansen
Kalaallit Peqatigiiffiisa Kattuffiat Inuit ileqquusumik Nunatsinnut juullimut inuulluaqqusimmata kalaallinit ornigarneqarluarpoq.
Bilitsinik siumut tuniniaanermi 1.200-t pisiarineqarput, siorna peqataasut amerlassusaattut amerlatigisut. Ualisorlu Peqatigiiffiup Inuit siulittaasuata Camilla Siezingip bilitsit 300-t aamma tunineqarsimaput paasissutissiissutigaa, taamaalilluni DGI-p timersortarfissuani 1.500-t missaanniittut peqataapput.
Aammattaaq Kalattoortoqarpoq.
Assiliisoq: Jesper Hansen
- Tuppalleqqaqalungalu nuannaaqaanga, naak paarsisoqarnerusariaqarnisinnik kavaajaartarfimmilu sulisussanik amerlanerusunik pissarsisariaqalernitsinnik kinguneqaraluartoq, Camilla Siezing oqarpoq.
Ulloq nalliuttorsiorfik
Kalaallit qallunaallu Kalaallit Nunaannut attuumassuteqartut amerlasuut ulloq nalliuttorsiorfigaat. Ukiut 50-it matuma siorna Fællesforeningen Inuit, Danmarkimi kalaallit peqatigiiffiinik kattuffiusoq, pilersinneqarpoq, taamaattumik siulersuisut pissanganartumik nutaalianillu arlalinnik aaqqissuussisimapput.
Nissimaannguaq nulialu Vejlemi jullimut inuulluaqqusinermut soorunami aamma aqqussaarput.
Assiliisoq: Jesper Hansen
Hinnarik nuannarineqarluartoq Kalaallit Nunaannit timmisartumik tikiunneqarsimasoq tusarnaartitsivoq, timersortarfiullu ilaani mikinerusumi Arctic Sport Nuuk meeqqanut Inuit & Dene Gamesimik aaqqissuussivoq.
Hinnarik Kalaallit Peqatigiiffiisa Kattuffiat Inuit ileqquusumik aaqqissuussaani 1.500-nik peqataasulimmi aliikkusersuivoq.
Assiliisoq: Jesper Hansen
Ullormi tassani oqalugiarnerit pisarnertut ingerlanneqartartut amerlanersaat pinngillat. Taarsiullugu ullormi siullermeerluni saqqummiisuusoq Gitte-Anna Biilmann scenemi apersuisaqattaarpoq – ilaatigut Camilla Siezing aamma kattuffimmi ukiut 50-it ingerlaneranni siulittaasuusarsimasut, aamma kalaallit-qallunaallu meerartaat naasorissaasoqarfimmi kukkukuut, kaninat aasiaallu akornanni inuuneq pillugu nuannersumik apersorpai.
Puullaaqineq
Ualikkut naggataarnersiornermi peqataasut illoqarfinni assigiinngitsuneersut isiginnaartitsivimmiit aalaterillutik inuulluaqqusipput. Inuulluaqqusineq puullaaqinarsinnaagaluartoq aaqqissuussap annertuup tassa siunertaa, aaqqissuussarmi KNR-ikkut toqqaannartumik aallakaatinneqarpoq.
Ualikkut nereqatigiittoqarlunilu qitittoqarpoq.
Perngaammik aqutsisuusoq Aalborgimiu Gitte-Anna Biilmann.
Jesper Hansen
Ulloq aallarnerlugu Vejlemi oqaluffimmi naalagiaqatigiittoqarpoq. Aamma tassani inunnik ulikkaarpoq. Oqaluffik 300-ngajannik issiavissaqarpoq, taamaattumik inuit 1000-it affaannik amerlassuseqartut ilaat oqaluffiup tunuani nikorfasariaqarsimapput. Guuterput naggasiutigineqarmat tamarmik qullilipput.
Biskoppi Paneeraq Siegstad ajoqilu Atsa Tittussen naalagiartitsipput.
Vejlemi naalagiaqatigiinnermi biskoppi Paneeraq Siegstad ajoqilu Atsa Tittussen naalagiartitsisuupput.
Assiliisoq: Jesper Hansen
