Republikanerit præsidentitut qinigassanngortitaat Donald Trump ajugaasutut nalunaarutigineqarmat USA-milu præsidentinngortussanngormat nunanit tamalaanit pilluaqquneqarpoq.
* Ministeriuneq Mette Frederiksen (S) tusagassiuutinut nalunaarummi Donald Trump pilluaqquaa.
- USA suleqatitsinni pingaarnerpaajuvoq. USA-p Danmarkillu qanimut suleqatigiinnerat attatiinnartariaqarparput Atlantikullu illuatungaani ataqatigiinneq kinguaariinni atajuarsimasimasoq nukittorsarlugu, Mette Frederiksen oqarpoq.
* Israelimi ministeriunerup Benjamin Netanyahup Trumpip ajugaanera „oqaluttuarisaanermi uteqqinnertut annerpaatut“ taavaa, taavalu Donald Trump nulialu, Melania Trump, pilluaqqullugit.
- Det Hvide Husimut oqaluttuarisaanermi annertuumik uteqqinnersi Amerikamut nutaamik aallartiffiuvoq aammalu Israelip USA-llu suleqatigiilluarnerata nukittorsarneqarnissaanut pisussaaffimmik annertuumik tigusiffiulluni. Ajugaaneq tamanna annertuvoq, Netanyahu inuit attaveqaqatigiittarfiinut X-imut allappoq.
* Ukrainep præsidentiata Volodymyr Zelenskyjip neriuutigaa Donald Trump Ukrainemi eqqissinermik pilersitseqataasinnaasoq.
- Præsident Trumpip nunarsuaq tamakkerlugu pissutsinut tunngatillugu „pissaaneq aqqutigalugu eqqissineq“-mik periuseqarniarluni aalajangernera nuannaarutigaara. Tamannarpiaq Ukrainemi eqqissinermik naapertuilluartumik qaninnerulersitsisinnaavoq, Zelenskyj X-imut allappoq.
* Ruslandimi Kremlimit oqaaseqartartoq Dmitry Peskov pingasunngormat oqarpoq Ruslandip præsidentiata Putinip Trump pilluaqqujumanngikkaa.
Nutaarsiassaqartitsivik AFP naapertorlugu Trumpip præsidentinngornissaa pillugu ima oqarpoq: “Iliuuserisimasai oqaaserisimasaalu tunngavigalugit inerniliiumaarpugut.
* NATO-p generalsekretæriata Mark Ruttep aamma Trump pilluaqquaa.
- Taassuma siulersuinera suleqatigiinnitta nukittujuarnissaanut pingaaruteqarluinnarpoq, Rutte X-imi allappoq.
* EU-p ataatsimiititaliarsuani siulittaasup Ursula von der Leyenip Donald Trump pilluaqquaa kajumissaarutigaalu EU-p USA-llu suleqatigiinnerat attanneqassasoq.
- EU USA-lu iligiiginnanngillat. Inuiaqatigiittalu akornanni piviusumik suleqatigiippugut, tamannalu innuttaasunik 800 millioninik ataasiussuseqalersitsisuuvoq.
- Taamaattumik Atlantikup illuatungaani suleqatigiinnerup nukittuumik anguniagaqarfiunissaa sulissutigisariaqarparput, Ursula von der Leyen X-imi allappoq.
* Frankrigip præsidentia Emmanuel Macron allappoq Donald Trumpimik suleqateqaqqinnissani qilanaarisimallugu.
- Illit upperisat uangalu upperisara. Ataqqinninneq angusaqarluarusussuserlu. Eqqissinerunissaq pigissaarnerunissarlu pillugit, taanna allappoq.
* Italiap ministeriunerata, Giorgia Melonip, Trump „pilluaqquaa“ aamma „ingerlalluarsimanerarpaa“. Italia USA-lu tassaapput nunat qatanngutigiit, allappoq, nukittuumik iligiittut, assigiimmik naleqartitallit oqaluttuarisaanermilu ikinngutigiittut, allappoq.
- Ataqatigiissuseq periusissiaavoq, qularinngilaralu maannakkut nakussatsissinnaagipput, Meloni X-imut allappoq.
* Ungarnip ministeriunerata, Viktor Orbánip, aamma erseqqissarpaa Trumpip uternera oqaluttuarisaanermut ilannguttoq — Amerikap politikkikkut oqaluttuarisaanerani aatsaat taama annertutigisoq — aamma „ajugaanerujussuusoq“, X-imi allappoq.
- Ajugaaneq silarsuup pisariaqartilluinnarpaa, Orbán allappoq.
* Tuluit Nunaanni ministeriunerup Keir Starmerip Trump pilluaqquaa qinersinermilu ajugaanera „oqaluttuarisaanermi pingaaruteqarluinnartutut“ taavaa.
- Ukiuni aggersuni suleqatigilernissat qilanaaraara. Iligiinni qaniginerpaasatsitut suleqatigiippugut ataatsimut naleqartitavut, kiffaanngissuseq, demokratii namminersorlutillu suliffeqarfiit illersorniarlugit.
* Tysklandip kansleriata Olaf Scholzip pilluaqqusinermini aamma suleqatigiilluarnerup ingerlateqqinneqarnissaa pingaartippaa.
- Tyskland USA-lu sivisuumik suleqatigiissimapput Atlantikullu illua’tungaani tamani pigissaarnermik kiffaanngissutsimillu siuarsaallutik. Innuttaasutsinnut iluaqutaasumik tamanna nangissavarput, X-imi allappoq.
* Mexicomi præsidentip Claudia Sheinbaumip Trumpip qinigaanera nunaminut ernumanartinngilaa, naak akitsuutinik qaffaasoqarnissaa nunamullu aallarussaatitsisoqarnissaa ilimagineqaraluartoq.
AFP naapertorlugu taanna oqarpoq: „Nunaavugut kiffaanngissuseqarlutalu namminersortut USA-mullu attaveqarluassaagut.“
* USA-p killeqarfiata avannaani Canadami ministeriunerup Justin Trudeaup Trump pilluaqquaa. Canadap USA-llu attaveqatigiilluarnerat nunarsuup sinneranit sinngagineqarpoq, Trudeau oqarpoq.
- Nalunngilara præsident Trumpilu suleqatigiissasugut nunatsinnut tamanut periarfissanik, pigissaarnermik isumannaassusermillu pilersitsinissaq pillugu, Trudeau X-imut allappoq.
* Indiap ministeriunerata, Narendra Modip, Indiap USA-llu attaveqatigiinnerisa nakussatsinneqarnissaat qilanaaraa, Trumpilu „ikinngutimisut“ taasani „qamannga pisumit pilluaqqungaarpaa“.
„Siornatigut præsidentiunerit iluatsilluarsimasoq tunngavigalugu suleqqilernissanni suleqatigiinnitta nutarternissaa kiisalu USA-p Indiallu nunarsuaq tamakkerlugu suleqatigiinnerata nukittorsarnissaa qilanaaraara, X-imut allappoq.
/ritzau/
