Atassut: Kommunip nikotinimik inerteqqusersuinera inuup kiffaanngissusaanik kalluivoq
Atassutip Inuusuttaasa Kattuffianni siulittaasuata Angutinnguaq Schmidtip Qaqqata Kommuniata suliffimmi snuseriartoqqusaannginnissaanik aalajangernera sakkortuumik isornartorsiorpaa. Inerteqqut kommunalbestyrelsimit akuerineqartoq, sulinerup nalaani pujortaqqusaannginnermut atuuttumut ilassutaavoq.
- Kommunalbestyrelsimi ilaasortat kaammattorusuppakka suliffimmi snusit pillugit nalilersueqqeqqullugit, aaqqissutissamillu allamik ujartueqqullugit inuup nammineq aalajangiisinnaaneranut kalluinngitsumik, Angutinnguaq Schmidt, Atassutip Inuusuttaasa Kattuffianni siulittaasoq kajumissaarivoq.
Privatfoto
Qeqqata Kommuniani atorfeqaruit sulinerup nalaani pauserninni cigaretsinik pujortaqqusaanallu snusitoqqusaanngilatit.
Inerteqquteqalersitsineq kommunip 2022-mi sulinerup nalaani pujortaqqusiunnaarnerup malitsigaa.
Siulittaasup sulinerup nalaani pujortaqqusiunnaartoqarnera paasisinnaanerarpaa. Snusilli pineqalersillugit killissamik qaangiinertut isigaa.
- Snusilli pineqalersillugit killissamik qaangiinertut isigaara. Snusernissaq inuup nammineq toqqagarivaa namminerlu kisimi eqqugaassalluni. Inuttut nammineq toqqagassaavoq sulisup nammineq akisussaaffia. Taamaammat isumaqarpunga Qeqqata Kommunia sulisitsisullu allat taamatut inuit sulisullu sinnerlugit aalajangiisinnaasussaanngitsut, Angutinnguaq Schmidt allappoq.
Killissaq sumiippa?
Sulinerup nalaani pausernermi sulisunik killilersuinerup killissaa sumiinnersoq Angutinnguaq Schmidtip apeqquserpaa.
- Sulisut qaqugukkut snuseqqusaanersut aalajangersornialissagutsigu ila sumut killeqassava? Kommunip tullinnguullugu aalajangernialissanerpaa aamma suut taquarisassanerigut? Immaqaluunniit aamma peqqinnissaq tunngavilersuutigalugu imeruersaatit sukkullit inerteqqutaatinnialissavaat? Taamatut sulisut inuunerannut akuliunniarsarineq pinngitsoortittariaqarparput.
- Nalunngilara Qeqqata Kommuniani taamatut aalajangersimaneq Atassuteqatitsinniit peqataaffigineqarsimasoq, soorunalimi nammineerlutik isummersinnaassuseqaramik ataqqivarput, taamaattorli Atassutip Inuusuttaaniit taamatut inerteqquteqartitsiniarneq ersarissumik oqariartuuteqarfigaarput.
- Aalajangerneq nalilersoqqinneqarli!
Angutinnguaq Schmidtip kommunalbestyrelsi kajumissaarpaa aalajangiineq eqqarsaatigeqqeqqullugu, aaqqiissutissallu sulisut peqqissutsiminnut tunngatillugu namminneq aalajangiisinnaatitaanerannik ataqqinnittut isiginiarneruqqullugit.
- Kommunalbestyrelsimi ilaasortat kaammattorusuppakka suliffimmi snusit pillugit nalilersueqqeqqullugit, aaqqissutissamillu allamik ujartueqqullugit inuup nammineq aalajangiisinnaaneranut kalluinngitsumik, Angutinnguaq Schmidt, Atassutip Inuusuttaasa Kattuffianni siulittaasoq kajumissaarivoq.
Qeqqata Kommunia ilisimatitsivoq nikotinamik akullit inerteqqutigineqarnissaat kommunip meeqqanut inuusuttunullu pujortarneq takussaannginnerulersinniarlugu periusissiaanut ilaasoq. 2021-mi novembarimili kommunalbestyrelsi kommunip paaqqinnittarfiini pujortarfiunngitsunik politikkimik akuersivoq, taannalu 2022-mi maajip aallaqqaataani atuutilerpoq.
Suliniutit taakkua siunertaraat avatangiisit peqqinnarnerulersinnissaat aamma meeqqat inuusuttullu pujortartalernissaat nikotinimillu akulinnik atuilernissaat pinngitsoortinniarlugu.
