Attaveqaqatigiinnermut ingerlatsiviup annertuumik internetitalimmik Kalaallit Nunaat ilannguppaa
Immikkut ittumik killeqanngitsumik oqarasuaatikkut oqaluussisinnaanermut mobilimik ingerlatsiviup 3-p Kalaallit Nunaat ilannguteqqammerpaa, tassanilu 30 GB-it 100 GB-illu akornanni internetimik atuisoqarsinnaavoq, atuisuuffik sorleq atornerlugu apeqqutaalluni.
Leiff Josefsen
Kalaallit Nunaannit Danmarkimut EU-llu sinneranut angalakulasut maanna mobilimik atuinerminni akiligassaqarpallaannginnissartik qulakkeersinnaavaat.
3LikeHome-mik taaguutillit atuisuuffimmut isumaqatigiissutit assigiinngitsut mobilimik ingerlatsiviup 3-p neqeroorutigisarpai.
Atuisuunermut akigititaq, qaammatini pingasuni tulliuttuni 50 procentimik maanna atuisut nutaat sipaaruteqarfigisinnaasaat, qaammammut 160 koruunit 210 koruunillu akornanniippoq, internet 30 GB imaluunniit 100 GB perusunnerlugu apeqqutaalluni. Killeqanngitsumik oqaluussisinnaaneq taakkununnga tamanut ilaavoq, tamannali Kalaallit Nunaanni Danmarkimilu kisimi atuutissalluni.
Killeqanngitsumik internetersinnaaneq
Killeqanngitsumik oqaluussisinnaaneq internetersinnaanerlu internetimik atuinikkaanut aamma periarfissaavoq, qaammammullu akiliutissaq 270 koruuniussalluni.
Atuisuuffiit aamma Kalaallit Nunaata Japanillu ilanngunneqarnerat pillugit 3 nittartakkamini ima allappoq:
-Iigarterit, anersaajallagit isumakuluuteqarnallu sulinngiffeqarnerit atorluaruk. Nunanut allanut angalatillutit mobilit nalinginnaasumik atorsinnaavat. Atuisuuffinnimi nuannarineqarnerpaat ilaat 3LikeHomemi ilaavoq. Taamaalillutit ernummateqarnak internetimik atuisinnaavutit, sianersinnaavutit mobilinnullu akiligassat ernummatigisariaqarnagu. Nunat 75-it kiffartorpavut, ilaatigut EU tamakkerlugu, Tuluit Nunaat, USA, Tyrkia, Thailand qallunaallu angalaffigisartagaat, nittartakkami allassimavoq.
