Atuarfik Kilaaseeraq nutarterlugu aallartinneqalerpoq
Nutarterineq maanna aallartissinnaanngorpoq. Maniitsumi Atuarfik Kilaaseeqqap tamakkiisumik nutarternissaanut Qeqqata Kommuniata Permagreen Greenland A/S pingaarnertut suliaqartussatut isumaqatigiissuteqarfigaa.
Foto: Tôrtia Reimer-Johansen
Maniitsumi innuttaasut juullip qaammataani kaattarpaluk tusaasinnaassavaat. Juullimmi qaammataani Atuarfik Kilaaseeraq tamakkiisumik nutarterlugu aallartinneqassaaq.
Tamakkiisumik nutarsaalluni sanaartorneq juunimi 2027-imi naammassissangatinneqarpoq. Atuarfik ullutsinnut naleqqussarneqarluni tamakkiisumik nutarsarneqassaaq.
- Atuarfik Kilaaseeqqap nutarsarnera maannakkut aallartissinnaagatsigu nuannaarutigisorujussuuarput. Taamaalilluta Maniitsumi atuartitsinermi pissutsinik kiisalu sulisunut atuartunullu sulinermi atugassanik pitsanngorsaanermut tunngatillugu pingaarutilimmik angusaqarpugut, Teknikkimut Avatangiisinullu Ataatsimiisitaliap siulittaasua Nivi H. Efraimsen aamma Ilinniartitaanermut Ataatsimiisitaliap siulittaasua Evelyn Mølgaard tusagassiuutitigut nalunaarummi allapput.
Atuarfimmik sanaartornermut ataatsimiititaliaq atuarfiup siulersuisuinik, ilinniartitsisunik, aamma atuartut sinniissaannik kiisalu atuarfiup aqutsisuinit inuttaqartoq suliniummik ilusilersuinermut immersueqataanikuupput.
Masanti A/S pilersaarusiortuullunilu siunnersuisuuvoq. Kommunalbestyrelsi nutarsaanissamut katillugit 146 millionit koruuninik immikkoortitsinikuuvoq.
