Berit Byg ukiuni sisamani affarmilu Narsami, peqqissaasutut sulereerluni soraarniuteqarpoq. Suli sulerusukkaluarpoq taamaattorli sulinikkut ileqqorissaarnikkullu pissutsit akuersaarsinnaajunnaarpai. Kisimiinngilarli. Sermitsiap paasissutissaatai naapertorlugit peqqissaasut allat arlallit pissutsit tunngavigalugit suliffimminnit decemberip aallaqqaataani atuutilersumik, soraarniuteqarput.
Berit Byg naapertorlugu aqutsisut tungaanniik paasinninnermik takutitsisoqanngilaq.
Berit Byg ukiuni sisamani affarmilu Narsami, peqqissaasutut sulereerluni soraarniuteqarpoq. Suli sulerusukkaluarpoq taamaattorli sulinikkut ileqqorissaarnikkullu pissutsit akuersaarsinnaajunnaarpai. Kisimiinngilarli. Sermitsiap paasissutissaatai naapertorlugit peqqissaasut allat arlallit pissutsit tunngavigalugit suliffimminnit decemberip aallaqqaataani atuutilersumik, soraarniuteqarput.
Berit Byg naapertorlugu aqutsisut tungaanniik paasinninnermik takutitsisoqanngilaq.
- Sulisut ikilisarneqarnerat pillugu naammagittaalliuteqarnitsigut innuttaasut toqqissisimajunnaarnissaat pinaveersaarniarlugu nuannersunik oqaluttuartaqqulluta siunissamullu isigisaqqulluta oqarfigineqaannarpugut. Sulisut ikilisarneqarnissaat pillugu siunnersuutinik tusarniaavigineqanngivippugut. Sulialluunniit ingerlanneqarnerani paasissutissinneqarnissarput pisariaqanngitsoq isumaqartoqarpoq.
Malunnaatilimmik ajorseriarneq
Berit Byg naapertorlugu Narsami sulinerani atugassarititaasut malunnaatilimmik ajorseriarput.
Narsami nakorsiartarfik nakorsanik pigaartoqartarunnaarneranit ukioq ataaseq affarlu qaangiuppoq. Piffissat nakorsaqarfiunngitsut sivisuut peqqissaasutullu annertoorujussuarmik suliassaqarnerulernissaq tamassuma kingunerisaanik pilerput, nakorsap siornatigut suliarisartagaanik, amerlasuunik taakku malitseqartitsisariaqartarmata.
- Soorlu tamanna naammanngitsoq, sulisunik annertuumik ikilisaanissaq upernaakkut sapaatip-akunneri marluk sioqqullugit nalunaarutigineqarpoq. Peqqissaasut, oqalutsit angallassisartullu (portøre aaqq.) pineqarput. Peqqinnissaqarfimmi, sulisunik nunanit allaneersunik annertuumik pisariaqartitsiffiusumi oqalutsit angallassisartullu ikilisarneqarnissaat piumasarineqarsinnaammat tupinnarluinnarpoq. Sulisummi ataasiakkaat amerlanertigut suliassarpassuarnik assigiinngitsunik isumaginnittarput, tamarmillu peqqissaavimmik pitsaasumik ingerlatsisinnaanissamut pingaaruteqarlutik.
Sulinermi atugassarititaasut ajornarluinnartut
Berit Byg naapertorlugu nakorsanik sulisoqarnerup annikillisinneqarnerata kingorna peqqissaasut suliassai annertoreersimapput. Sulisullu ikilisinneqaqqinneratigut suliassat tamaasa naammassiniarnissaat ajornarpoq.
– Tamanna uannuinnaq sulininni atugassarititaasunut tunnganngilaq. Innuttaasut isumannaatsuunissaannuttaaq tunngavoq. Tamatuma saniatigut peqqinnissaqarfiit sumiiffinni assigiinngitsuniittut amerlanersaat sumiginnarneqartut isumaqarpunga. Narsami innuttaasut najugaqaannarnissaat kissaatigineqannginnersoq, eqqarsaatigineqanngitsoorsinnaanngilaq.
Ilinniaqqinnissamut periarfissaqannginneq
Sulisut ilinniaqqinnissamut periarfissinneqarsinnaanerat peqqinnissaqarfimmi sulisussarsiornerup sulisullu attatiinnarnissaata pitsaanerulersinnissaannut atorneqarsinnaasoq peqqinnissaqarfimmi aqutsisut politikerillu assigiinngitsut arlaleriarlutik oqaatigisarpaat.
Berit Bygilli naapertorlugu Narsami ilinniaqqinnissamut ilinniakkamilluunniit qaffassaanissamut periarfissaqarnikuunngilaq. Suliassat ullut tamaasa ima amerlatigisimapput, sulisoq arlaannaalluunniit sulinngiffeqarsinnaanani. Tamatuma saniatigut piffissami sivikitsumi paarlattaasartut assigiinngitsorpassuit atorlugit ingerlatsineq pinngitsoorneqarsinnaanngilaq.
– Immitsinnut pinngitsoorsinnaanngilagut sanngiitsuaraallutalu.
Aammattaaq Narsaq peqqissaasunngorniartunik ilinniartunik tikisitsisinnaanngilaq, ilinniartut toqqissisimanartumik ilinniarsinnaanissaannut, ilinniarnerminnilu pitsaasumik naammattumik avatangiiseqarnissaannut piffissallu eqqarsaatiginissaanut, periarfissaqanngimmat.
– Tamanna alianarpoq ingerlatsinerluttoqarneranullu tamanna ersiutaavoq, Berit Byg oqarpoq.
– Peqqissutsimut sullissivik ajalusooriartortoq akuersaarlugu suliinnarnissara kissaatiginngilara. Ernumavunga, assut, assut ernumavunga, peqqissaasoq Berit Byg oqarpoq.
Assi: Nammineq pigisaq
Kukkusoqarataannaavoq
Telemedicin (Digitali aqqutigalugu nakorsiarneq. aaqq.) videokkullu nakorsiartarnerit aaqqiissutissatut annertuumik oqaluuserineqarput, taakku sumiiffinni innuttaasut peqqinnissaqarfimmilu sulisut tapersersussavaat. Berit Bygili naapertorlugu taakku naammanngillat.
– Nuummiittumimmi oqarasuaatikkut oqaloqateqarsinnaavugut. Tamanna ajunngilaq, uangali peqqissaasuuvunga. Taamatut pisoqartillugu qanoq iliortarnissannut ilinniagaqanngilanga, Berit Byg taama oqarpoq. Nakorsap peqqissaasulluunniit napparsimasoq qanimut naapinnissaa aalajangiisuulluinnartoq taanna isumaqarpoq.
– Napparsimasut ilarpassui ima sakkortutigisumik napparsimasarput, nakorsap peqqissaasulluunniit napparsimasoq qanimut naapinnissaa kinguartinneqarpat, ajornerpaaffiani toqumik kinguneqarsinnaavoq, Berit Byg oqarpoq.
– Peqqissaasunik naammattunik pisariaqartitsivugut, taakkulu suliatik pitsaasumik suliarisinnaaniassagamikkit piffissaqarlutillu eqqissisimasariaqarput. Napparsimasut katsorsarneqarnerannut tamanna nakorsat sulinerattulli pingaaruteqartigaaq, ilanngullugu taama oqarpoq.
Nipituuliuutigineqartariaqarpoq
Berit Byg naapertorlugu pissutsit oqaatigineqarnissaat pisariaqartinneqarpoq.
- Peqqissutsimut sullissivik ajalusooriartortoq akuersaarlugu suliinnarnissara kissaatiginngilara. Ernumavunga, assut, assut ernumavunga. Nunatsinni qanoq ittumik peqqissutsimut sullissiveqarnissarput kissaatigineripput tamanut ammasumik politikkikkullu oqallinnissaq pisariaqartinneqarpoq, Berit Byg oqarpoq.
Sermitsiap peqqinnissaqarfimmi aqutsisut Narsami peqqinnissaqarfiup unammilligassai pillugit oqaaseqartinniaraluarpai, maannamulli akissutisinani.