Københavnip mittarfiani ilaasut milliardit angugaat
Københavnip mittarfiani ilaasut milliardissaat Barcelonamut aallartoqarmat imeruersaatinik sassaalliisoqarluni jazzimillu nipilersortoqarluni nalliussineqarpoq.
Magnus, Jørgen Karenilu Københavnip mittarfiani Jørgenip ilaasut milliardissarigaat nalliuttorsiutigigaat. Pisortaaneq Christian Poulsen talerpiatungaani takuneqarsinnaavoq.
Assi: Thomas Traasdahl/Ritzau Scanpix
Jørgen Bille Medtgaard ernuttami Magnusip Barcelonamut arsaattoriarluni angalanissamut tunissutisiaanik tigusiniarluni pingasunngornermi Københavnip mittarfianut apuukkami immikkut ittumik misigisaqarpoq.
Tassami mittarfik 1925-mi ammarneqarmalli ilaasut milliardissaattut taaneqarpoq.
Timmisartorluni angalanissamut bilitsinik, pisiniarfinnut neriniartarfinnullu pisissutissanik arlalinnik tunineqarpoq, Barcelonamullu ilaasussat sinneri angusamut atatillugu aamma tunissuteqarfigineqarput.
- Ilaasummi milliardissaat soorunami nalliuttorsiutigineqassaaq. Ilaasut siullersaat Berlinimut timmisartorpoq, ullumilu ilaasut milliardissaat Barcelonamut timmisartorpoq.
- Taamaammat nuannisaaqatigiinnitsinni nipilersortoqarlunilu, mittarfimmi tunissuteqartoqarlunilu, champagnemik sassaallertoqarlunilu timmisartumi imeruersaatinik killeqanngitsumik sassaalliisoqarpoq. Barcelonamukartut angalalluarsimassasut qularinngilara, mittarfimmi pisortaaneq Christian Poulsen oqarpoq.
Københavnip mittarfiani siorna 32,4 millioninik ilaasoqarpoq — aatsaallu taamak amerlatigipput. Ingerlatseqatigiiffiup ukioq manna 34,5 millioninik ilaasoqassalluni naatsorsuutigaa.
Aappaagulu terminali 3-mi immikkoortortaq nutaaq ammarneqarpat ilaasut suli amerlanerusut inissaqalissapput.