Inuit Ataqatigiit Demokraatillu naalakkersuisooqatigiilernerat Inatsisartuni akuerineqarpoq, Naalakkersuisunullu ilaasortat nutaat ilisaritinneqarput.
Kommune Kujallermi borgmesteriusimasoq, Inuit Ataqatigiinneersoq Stine Egede Isumaginninnermut, Suliffeqarnermut, Ilaqutariinnut Nunamullu Namminermut akisussaasunngorpoq.
Inuit Ataqatigiit Demokraatillu naalakkersuisooqatigiilernerat Inatsisartuni akuerineqarpoq, Naalakkersuisunullu ilaasortat nutaat ilisaritinneqarput.
Kommune Kujallermi borgmesteriusimasoq, Inuit Ataqatigiinneersoq Stine Egede Isumaginninnermut, Suliffeqarnermut, Ilaqutariinnut Nunamullu Namminermut akisussaasunngorpoq.
Tamakku tamaasa 2021-miit 2025-mut borgmesteriunermini, misilittagaqarfigereerpai. Misilittakkalli aamma isornartorsiorneqarput. Kommunip meeqqanut isumaginninnermullu tunngasunik ingerlatsinera ukiuni arlalinni, sakkortuumik isornartorsiorneqarlunilu aningaasaqarneq annertuumik tatineqarpoq. Stine Egedep akisussaaffik aningaasaqarnikkut ajornartorsiortoq akisussaaffigilerlugu nammineerluni nassuiaatigaa. Misilittakkat nuna tamakkerlugu pitsaanerusumik mumisitsisinnaanersut maanna takutissallugu taassuma periarfissarilerpaa.
Jens-Erik Kirkegaardilli politikkimut uternera tupaallannarneruvoq. Taanna Avatangiisinut, Pinngortitamut, Nukissiornermut Ilisimatusarnermullu akisussaasunngorpoq. Politikkimiit 2018-imi tunuaraluarluni tamanut ammasumik oqallinnermi peqataajuarpoq, ilaatigut Sermitsiami isummersornerminik allaaserinnittarluni.
Taanna Sermitsiami 2014-imi aggustimi apersorneqarnermini Siumumi aatsitassanut naalakkersuisuusimanermini Nunap Qeqqani uuliasiornissamut akuersissutinik neqerooruteqarneq pillugu oqaluttuarpoq. Politikkikkut iliuuserinikuusaa maannakkut eqqartorneqareerpoq, tassa Amerikamiut suliffeqarfiutaata Greenland Energy Companyp misileraalluni qillererusunnera.
Jens-Erik Kirkegaardip Siumut maanna qimassimalerlugulu Demokraatit sinniisuuffigilerpsi. Tunngaviusumilli isumaa allanngunngilaq: Kalaallit Nunaanni aningaasaqarnikkut ineriartorneq pinngortitamillu illersuineq oqimaaqatigiissarneqartariaqarput. Ilaatigut Alaskami Norgellu avannaani, aatsitassarsiornerup pinngortitamillu mianerinninnerup ataqatigiinnissaat anguniarlugu iliuuseqartoqarneranik misilittakkat innersuussutigai.
Kalaallit Nunaannili pissutsit ima maanna qanitsigilersinnaapput tunngaviusumik oqallinnerit politikkikkut aalajangersimasunik aalajangiinernik kinguneqarsinnaalerlutik.
Uuliasoqatigiiffik pilersaarutit malillugit 2027-mi ukiukkut qillerivilisarluni uteqqippat qanoq pisoqassava? Misileraalluni qillerinerit akuerissavagut? Uuliasioqatigiiffiullu misissuinermi uuliaqarluarneranik naqissusiippat imaassinnaavoq nappartat 20 milliardit angullugit annertussuseqartut, taamaappammi taava qanoq pissaagut?
Uuliaqarnersoq sivitsunngitsoq apeqqutaajunnaassaaq. Kalaallit Nunaata qanoq ineriartornissani kissaatigineraa, suut ulorianartorsiortitsisinnaasut aamma qanoq ililluni innuttaasut pisuussutinik pissarsinissaat qanoq qulakkeerneqarsinnaanersoq apeqqutaavoq.
Taamaammat Jens-Erik Kirkegaardip aamma aatsitassanut naalakkersuisup Múte B. Egedep suleqatigiinnerat malinnaaffigissallugu immikkut soqutiginaateqassaaq. Naalakkersuisooqatigiit avatangiisit illersorneqarnissaat aatsitassarsiornermut politikkimi qitiutillugu naleqqiullugulu pingaartinniarlugu suleqatigiissutigisassaminni neriorsuutigaat.
Stine Egede Jens-Erik Kirkegaardilu suliassanik oqimaatsunik suliassinneqarput, pingaartumik uuliamut tunngatillugu ajornartorsiut naalakkersuisooqatigiilersut aningaasaqarnikkut anguniagaqarnerminnik, politikkikkut akisussaaffeqarnermikkut Kalaallit Nunaatalu pinngortitaanik siunissaanillu isumaginninnermik ataatsimoortitsisinnaanerannut misilinneqaataasinnaavoq.