Imigassaq aalakoornartulik pillugu inerteqqut attatiinnarneqassanersoq kommunalbestyrelsip sisamanngorpat aalajangissagaa

Imigassamik aalakoornartulimmik tuniniaaneq kommunimi ammariartuaaqqinneqassanersoq Kommune Kujallermi kommunalbestyrelsip sisamanngorpat aalajangissavaa.

Saqqummersinneqarpoq

Naalakkersuisut Kommune Kujalliup qinnuteqarnera naapertorlugu kujataani imigassamik aalakoornartulimmik tuniniaaneq oktobarip aappaanni inerteqqutigilerpaat.

Inerteqquteqarnermut siunnersuutit marluk kommunalbestyrelsimi sapaatip-akunnerani matumani sisamanngorpat oqaluuserineqassapput.

Siunnersuut siulleq naapertorlugu imigassamik aalakoornartulimmik inerteqquteqarnerup atuutiinnarnissaa siunnersuutigineqarpoq, siunnersuutillu aappaani imigassamik aalakoornartulimmik tuniniaanerup sassaallernerullu ammaqqinneqarnissaat siunnersuutigineqarluni. Tamanna ullormut oqaluuserisassani allassimavoq.

Siunnersuutit kommunimi aningaasaqarnermut ataatsimiititaliamit suliarineqareersimapput, taakkualu siunnersuut 2, tassa imigassamik aalakoornartulimmik tuniniaanerup ammaqqikkiartuaarnissaanut siunnersuut akueraat.

Siunnersuut naapertorlugu imigassamik aalakoornartulimmik ammaasseqqinnermi piumasaqaatit inassutillu kommunip imigassaq aalakoornartulik pillugu atuutilersinniarsarisaasa ilaat arlallit piffissaq ungasinnerusoq eqqarsaatigalugu naammassineqartussaapput.

Imigassamik aalakoornartulimmik tuniniaaneq qaqugu ammaqqinneqarsinnaanersoq suli aalajangerneqanngilaq.

Kommunip imigassamut aalakoornartulimmut tunngasunik ajortunik pisoqartarsimanera pissutigalugu, ilaatigut Nanortalimmi angummik 37-nik ukiulimmik toqutsisoqarnera pissutigalugu, imigassamik aalakoornartulimmik tuniniaanerup matuneqarnissaanik Naalakkersuisut qinnuigai.

Powered by Labrador CMS