NUUK
Atuarfittaaq suli piariinngimmat - atuarfitoqqat atorneqarallassapput
Kinguaattoorneq siulleq 29. augustip tungaanut killilerneqaraluarpoq. Maannali Kommuneqarfik Sermersuumit nalunaarutigineqarpoq angumersisoqarsinnaanngimmat kinguaattoorneq piffissalerneqarsinnaanngikkallartumik sivitsorneqartoq. Tamatuma malitsigisaanik meeqqat Atuarfik Inussummi aallartittussaagaluartut Atuarfik Ukaliusami aamma Atuarfik Samuel Kleinschmidtimi 15. august aallartissasut.
Meeqqat aggustip 15-iani atualissapput, atuarfissaalli suli piareerneqanngimmat atuartut Atuarfik Ukaliusami imaluunniit Atuarfik Samuel Kleinschmidtimi ukioq atuarfiusoq nutaamik aallartisinneqassapput.
Asseq: Kommuneqarfik Sermersooq
Atuarfik Inussuk ajoraluartumik pilersaarut malillugu aggusti 2024-mi iserterfigineqarnissaminut piariinngilaq, taamak ilisimatitsivoq Kommuneqarfik Sermersooq.
Kinguaattoorneq illup ikuallattoornermi qatserutaanut ajornakusoortut suli akuersissutigineqannginnerannik pissuteqarpoq. Tamanna atuarfiup atulersinneqannginnerani misissorneqaqqaassaaq akuersissutigineqaqqaassallunilu.
Qaqugu meeqqat iserterfigiumaarneraat suli ullulerneqarsinnaanngilaq
Atuarfik Inussuup ammarnissaa ataasinngormat 15. aggustimiit 29. aggustimut kinguartinneqarpoq, kisianni massakkut paasinarsivoq atuarfik ulloq atualerfissaq eqqorlugu tunniunneqarsinnaanngitsoq.
Kommuneqarfik Sermersuumit kinguaattoornerup qanoq sivisutiginera massakkorpiaq ilisimaneqanngilaq. Kinguaattoorneq atuarfimmi atuartunut, sulisunut soorlu aamma atuarfimmiittumik eqqarsaartarfissamik atuisussanut sunniuteqarpoq taakkualu aamma illup piareernissaanut utaqqisariaqarput.
Illumi 18.000 kvadratmeteriusumi qatserutit tamarmik misissorneqassapput illullu atulersinneqannginnerani ikuallattoornermut isumannaallisaanermullu piumasaqaatit naammassineqassapput.
Atuarfik Samuel Kleinschmidtimi imaluunniit Atuarfik Ukaliusami aggustip 15-iani atuartut atualissapput
Atuartut atuarfittaassami atualertussaagaluit Atuarfik Samuel Kleinschmidtimi imaluunniit Atuarfik Ukaliusami ukioq atuarfiusoq aallartissavaat. Meeqqat sorliit atuarfimmi sorlermiissanersut suli aalajangerneqanngilaq, ingerlatsivimmiilli aalajangerneqarpoq ukioq atualerfiusoq pilersaarutaareersutut 15. aggusti aallartissasoq.
- Ajoraluartumik atuarfimmi ulluinnarsiuteqalertussanut tamanut qilanaartunut akornutaasinnaanera eqqumaffigeqqissaarparput. Ikuallattoornermi isumannaallisaanerup qulakkeeqqaartinnagu ammannginnissarput uatsinnut pingaaruteqarluinnarpoq, Kommuneqarfik Sermersuumi kommunaldirektøri Ole Jakobsen oqarpoq.
