KL

DK

Atuarfiup sananeqarnerata kinguaattoornera pissutigalugu akiligassiisoqassaaq

Sanaartortitsisup kommunip sanaartornermillu akisussaasup sanaartugassanik suliassinneqartartup akornanni Nuup illoqarfiata qeqqani atuarfiliornerup kinguaattoornera aningaasatigut kingunerlussaaq.

Sanaartornerup aallartinnginnerani atuarfissaq nutaaq ima titartarneqarpoq.
Tusagassiortoq
Saqqummersinneqarpoq

Islandimi sanaartugassanik suliassinneqartartoq Istak Nuummi atuarfiliornissamik piffissaq eqqorlugu naammassinnissinnaannginnami akiligassinneqarnissaa ilimanarpoq.

Atuarfik Inussuk, Atuarfik Ukaliusamik (USK) aamma Atuarfik Samuel Kelinschmidtimik (ASK) pisoqaavallaartunik taarsiisussatut sananeqartoq, pilersaarutit malillugit ukioq manna marsip aallaqqaataani atulertussaasimavoq. Pilersaarulli kinguartinneqarpoq, taamaattumillu atuartut atuarfinni pisoqaavallaartuni ASK-mi aamma USK-mi atuarput.

Ullormut akiligassat

Sanaartornermut Avatangiisinullu Ingerlatsivimmi pisortaq Søren Sohn Krog Pedersen Sermitsiamut ima oqarpoq:

Atuarfiup sananeqarnerata kinguaattoorfiunera pissutigalugu ullormut akiligassiisoqassava?

- Aap. Isumaqatigiissut naapertorlugu sanaartugassanik suliassinneqartartoq akiligassinneqartussaavoq piffissaq tunniussiffiusussaq qaangiummat.

Ullormut akiligassatut/taarsiissutissatut Sermersooq qanoq amerlatigisunik isertitaqarniarluni naatsorsuuteqarpa?

- Sanaartorneq naammassitinnagu tamanna naatsorsorneqarsinnaanngilaq.

Kalaallit Nunaanni atuarfiit annersaata sanaartorneqarnerani suut suli naammassineqannginnersut paasiniarlugu annertuumik suliaqartoqarpoq. Atuartut ilinniartitsisullu atuarfimmut nutaaliaasumut qaqugu nuussinnaassanersut Kommuneqarfik Sermersuumit suli oqaatigineqarsinnaanngilaq.

Silarsuarmi nappaalanersuaqarnerani sanaartorneq

Atuarfiup 1.200-t angullugit atuartoqarsinnaanissaa siunertarineqarpoq. 2018-imi sanaartorneq aallartippoq, 2019-imilu decembarimi sanaartornermut isumaqatigiissut 615 millionit koruuninik nalilik atsiorneqarpoq. Istak Islandimiippoq, qallunaalli sanaartugassanik suliassinneqartartuinit suliffeqarfissuarmit Per Aarsleff-imit 100 procentimik pigineqarluni.

Isumaqatigiissutip atsiorneqarnerata kinguninngua nunarsuaq tamakkerlugu Covid-19-ip tuniluunnera aallartippoq, tamatumalu nunami maani sanaartornerit arlallit, ilaatigut mittarfiliornerit, kinguaattoortippai.

skolebyggeri nuuk istak inuiaqatigiit grønland dagbøder covid 19 samfund

ATORFIIT Se alle jobs

Powered by Labrador CMS