Mette Arqe-Hammekenip (N) aalajangiiffigisassatut siunnersuutaa Inatsisartuni pingasunngornermi oqaluuserineqassaaq.
Kalaallit Nunaanni najugaqaraanni nunap iluani timmisartumik angalaneq akikinnerulertariaqartoq Naalakkersuisullu kingusinnerpaamik upernaaru aaqqiissutissamik tigussaasumik saqqummiussissasut taassuma siunnersuutigaa.
Mette Arqe-Hammekenip (N) aalajangiiffigisassatut siunnersuutaa Inatsisartuni pingasunngornermi oqaluuserineqassaaq.
Kalaallit Nunaanni najugaqaraanni nunap iluani timmisartumik angalaneq akikinnerulertariaqartoq Naalakkersuisullu kingusinnerpaamik upernaaru aaqqiissutissamik tigussaasumik saqqummiussissasut taassuma siunnersuutigaa.
Timmisartumut bilitsit akisuut ilaquttanut tikeraarnissamut, ilinniagaqarnissamut, suliffittaarnissamut, peqqinnissaqarfimmik atuinissamut, kulturikkut timersornikkullu aaqqissuussanut peqataanissamut nunamilu namminermi takornariarluni angalanissamut periarfissanik killilersuisut Mette Arqe-Hammekenip oqaatigaa.
Inuit avinngarusimasumi najugallit tamanna iluaqutiginerpaassagaat taanna oqarpoq.
- Kalaallit Nunaanni aalajangersimasumik najugaqarneq innuttaasut nunaminni angalasinnaanerannut aporfiusariaqanngilaq. Taamaammat aaqqissuussineq innuttaasut Kalaallit Nunaanni najugaqavissut pitsaanerusumik angalasinnaanissaannut periarfissiisoq sulissutigineqartariaqarpoq, pisariaqartitsinerusullu immikkut isiginiarneqarlutik, aalajangiiffigisassatut siunnersuutimi allassimavoq.
Naleraqqap Islandimi USA-milu aaqqissuussanut, inuit avinngarusimasumi najugallit angallannermut akissaqartinniarlugit ikiorneqartarnerannik innersuussivoq.
Aaqqiissutissanik assigiinngitsunik siunnersuuteqarput: Nunaqavissunut akit immikkuullarissut, inuit isorliunerusuni najugallit immikkut aaqqiissutinik atugaqartinneqarnissaat ukiumullu angalanerit, aalajangersimasut tapiiffigineqartalernissaat.
Ukiakkut siunnersuutit
Ineqarnermut, Attaveqaqatigiinnermut, Isorliunerusunut Upalungaarsimanermullu Naalakkersuisoq Iddimanngiiu Jensen Bianco (IA) angallannerup pitsaanerulersinnissaanik siunertaq tapersersorlugu akissuteqaammini allappoq.
Aaqqiissutaasinnaasorl kiffartuussinermut isumaqatigiissutit aallaqqaammut killilerlugu aaqqiivigineqarsinnaasoq Naalakkersuisut naliliipput.
- Nunatta iluani attaveqarnermi angallaviit tapiiffigineqanngitsumik ingerlanneqartut angallassisartunit akeqartitsivigineqartarnerat tamatumunnga pissutaavoq. Tamatuma saniatigut Inatsisartut aaqqiissutissanut isumassarsiat allassimaffiannut atitunerusumut saqqummiussivigineqartariaqaraluarput, tassami akikillisaavigineqarnissamut aaqqissuussinernut siunnersuutaasinnaasut agguaasarnermut najoqqutassanut, sumiiffinnut, aningaasalersueriaatsinut periaatsinullu aaqqiissutissanut sanilliullugu annertuumik assigiinngissuteqarsinnaapput, naalakkersuisoq allappoq.
Taamaammat Naalakkersuisut Kalaallit Nunaanni kiffartuussinissamut isumaqatigiissutit iluanni inuit Kalaallit Nunaanni najugaqavissut nunap iluani angalanerinik akikillisaaffigineqarsinnaanerat misissorneqarnissaannik, Naalakkersuisut piumaffigineqassasut, aaqqissuussinerinilu periarfissat pillugit isumassarsianik saqqummiussissasut allannguutissatut siunnersuuteqarput.
Isumassarsiat allattorsimaffiat ilaatigut najugaqarfiit tunngavigalugit immikkut akit imaluunniit angalanermut tapiissutit, inuit isorliunerusuni imaluunniit angallannikkut periarfissakilliorfiusuni najugaqartunut immikkut aaqqissuussinerit ukiumut angalanerit, qassit tapiissutigineqarsinnaasut, aningaasalersueriaatsit kiisalu aaqqissuussinerup aningaasaqarnikkut, allaffissornikkut inuiaqatigiinnullu sunniutai, ilaatigut agguataarinermi sunniutit pillugit naliliinernik imaqarluni kingusinnerpaamik 2027-mi ukiakkut ataatsimiinnissamut piareerneqassaaq.