Avannaata Kommunia utoqqaat illuannik nutaamik sanaartorniartoq
Uummannami utoqqaat illuat nutaaq pisariaqartinneqartoq Avannaata Kommuniani kommunalbestyrelsip siunnersuutigaa. Utoqqaat illuannut utaqqisut amerlanerpaartaat Uummannami najugaqartut tunngavilersuutigineqarpoq.
Uummannami utoqqaat illuanni inissamik utaqqisut aqqaneq-marluupput.
Toqqorsivimmit: Leiff Josefsen
Uummannami utoqqaat illuannik nutaamik pisariaqartitsisoqarpoq. Avannaata Kommuniani utoqqaat illuannut inissaqalernissamik utaqqisut 40-upput taakkunanngalu aqqaneq-marluk, tassa pingajorarterutaat, Uummannami najugaqarput.
Utaqqisut allattorsimaffianniittut aqqaneq-marluk saniatigut utoqqaat nunaqarfinni najugallit ulloq unnuarlu sulisusulimmik pisariaqartitsigaluarlutik najugaqatigiiffinni najugaqarput.
Uummannami utoqqaat illuannik nutaamik sanasoqassasoq kommunalbestyrelsimut ilaasortap Sakio Fleischerip (S) kommunalbestyrelsimut siunnersuutigaa.
- Utoqqarnik ulloq unnuarlu Uummannami paaqqutarinninneq pitsaanerusoq, aammalu utoqqarnerut assigiinngitsunik pisariaqartitsisunut naleqqunnerusoq pilersinneqassappat nutaamik sanaartornissaq periarfissaavoq.
- Utooqqaat ulloq unnuarlu paaqqutarineqartariaqartut Uummannami utaqqisut 12-iusut, aammalu nunaqarfinni utoqqaat najugaqatigiiffiini inissinneqartariaqarsimasut ulloq unnuarlu paaqqutarineqartariaqartut arlaqartut tamarmik inissaqalissappata nutaamik pilersitsinissaq pisariaqartinneqarpoq, tamannalu sanaartortoqarneratigut anguneqarsinnaalluni.
Aningaasartuutit avinneqarsinnaasut
Uummannami utoqqaat illuat pingasunik qulereeqarpoq, ukiulluni ingerlanerini pisariaqartitat aallaavigalugit sanaartorneqartarsimaluni.
Puigortunngorsimasut pitsortulluttu qullermiipput, allerlu pisinnaanerusunut ineqarfiulluni.
Avannaata Kommuniani teknikkimik ataatsimiititaliap naliliinera malillugu sanaartugassaq 60 millionit koruunit missaanni akeqassaaq. Aningaasartuutit affaat Namminersorlutik Oqartussanit matussuserneqarsinnaanersut qinnutigineqarsinnaasoq ataatsimiititaliamit paasisssutissiissutigineqarpoq. Teknikkimik ataatsimiititaliap naliliinera malillugu pilersaarusiornermut aningaasartuutissat 2,5 millionit koruuniupput.
Siunnersuut ilaqutariit aningaasaqarnermullu ataatsimiititaliap kommunalbestyrelsimit akuersissutigineqassasoq inassutigaa.
Kommunalbestyrelsimit inassuteqaat akuersissutigineqarluni suliniut nanginneqassasoq pingasunngormat aalajangerneqarpoq.
