Kalaallit Nunatsinnut, Issittup sinneranut aammalu atlantikup avannaanut sillimaniarnikkut aarlerinaatit, kalaallinut nalinginnaasumik ungasissutut tigussaanngitsutullu isumaqarnarsinnaapput ulluinnatsinnimi sungiusimanikuunnginnatsigu illersornissaq pillugu iliuutsit tigussaasut taamak annertutiginerat.
Taamaattumik tupinnanngilaq umiarsuit sorsuussuit ulluinnarni takuneq ajoraluakkagut nunatsinnut tikittalermata, massakkullu ulluni makkunani tyskit sorsuussuat Berlin nunatsinniippoq aammalu akuttunngitsumik sakkutuut timmisartortartut timmisartui takussaasarlutik.
Kalaallit Nunaanniilli Issittumi Sakkutooqarfik takornartaanngilaq, tassami danskit sakkutuui imarsiortuty Kalaallit Nunaanni kinguaariippassuit ingerlanerini maaneeqataapput toqqissisimanermillu annertuumik pilersitsisarlutik, ilaatigut nunap killeqarfii nakkutigineqarnerisigut isumannaatsuunissaat qulakkeersimaneqarluni, inerteqqutaasumik aalisartoqarsinnaanissaa pinngitsoortinniagaalluni aammalu Issittumi Sakkutooqarfik annaassiniarnermi ikiuuttarpoq inuit ajutooraangata ikiortariaqaleraangatalu pinngortitami sakkortuumiinnerminni.
Nunanut allanut naalakkersuisoq, Lund Poulsenip aamma Schmidip tikeraarneranni tikeraartitsisuusoq erseqqissaavoq Tysklandip, Kalaallit Nunaata aamma Danmarkip akornanni ataatsimiinneq oqaluttuarisaanermi pingaaruteqartoq.
- Nunarsuarmi sillimaniarneq allanngorpoq. Europami pissutsit allanngorput, sorsunneq Europamut uterpoq, aamma sillimaniarneq Issittumi allanngorpoq.
- Tamanna soorunami isumaqarpoq, Kalaallit Nunaanni, Issittumi politikkitta aamma periusissiarisartakkatta allanngortinnissaat pisariaqartikkipput.
- Uagut nunarsuarmi immikkoortortarput sakkutooqarnikkut sakkortusaarfiusanngilaq saassussinernillu misigisaqartarsimanata. Nunarsuup immikkoortortaa sakkulersorfiussanngitsoq pillugu siunniussarput erlinnartuuvoq, kisianni piviusut iliuuseqarfigineqartariaqarput. Tamanna angujumallugu, ikinngutivut NATO-mi suleqatigisartakkavut suleqatigisariaqarpavut. Tyskland, Danmarki aammalu Kalaallit Nunaat tamarmik illersoqatigiillutillu suleqatigiinnermut ilaapput, Motzfeldt ilaatigut oqarpoq.
Aarlerinartorsiorneq sakkortooq iliuuseqarfigineqartariaqarpoq
Kalaallit Nunaat ataatsimut isigalugu ukiuni amerlasuuni nunap isumannaatsuunissaanut aarlerinartorsiortitaanngitsutut inissisimasimavoq. Malugineqarnikuuvorli sorsunnersuit aappaata nalaani, tassanilu Amerika Kalaallit Nunaata isumannaatsuunissaanut pilersorneqarnissaanullu ikiuussimavoq.
Tassa sorsunnersuup aappaata nalaani ikiorneqarsimanerup saniatigut qanittoq tikillugu Danmarkip Kalaallit Nunaat illersornissakkut nunallu isumannaatsuunissaanik isumagiuartarsimavaa kisimiilluni, kingullertigulli USA-p præsidentia Kalaallit Nunaat Danmarkilu sakkortuumik piumaffigisarsimavai, tamannalu kinguneqarpoq Europami nunat iligiinneersut Kalaallit Nunaat aammalu Issittup sinnera illersorniarlugit piumassuseqarluarnerminnik takutitsiualernerannik.
Piffissami matumani Tysklandiip illersornissamut ministeriata tullersortaa, Dr. Nils Schmid aammalu Danmarkip illersornissamut ministeria Troels Lund Poulsen. Tamannalu nalaatsornerunngilaq.
Nato tassaavoq nunanut ilaasortaminut ataatsimoorussamik illersoqatigiiffik, kisianni aamma Nato-mi nunat ataasiakkaat akornanni isumaqatigiissutit atuupput. Tyskland, Canada, Norge aammalu Danmark suleqatigiinnermut isumaqatigiissuteqarput, tamannalu tunngavigalugu Tysklandip sakkutuuisa imarsiortut umiarsuat anginerpaaq Berlin Nuummiippoq.
Rusland tassaavoq ulorianarlunilu aarlerinartoq
Tyskit illersornissamut ministeriata tullersortaata, Dr. Nils Schmid taamatut aarlerinartorsiorneq imatut ilaatigut nassuiarpaa:
Ruslandip peqqarneeqaluni nunatut nunanik allanik tiguaaniarnera Ukrainemut imaluunniit Østersøen-imut killeqanngilaq, tamatumalu ilutigisaanik silap allanngoriartornerata kingunerisaanik umiarsuit aqqutaat nutaat aammalu pisuussutinik pilersitsiviit Kalaallit Nunaanni Issittullu sinnerani periarfissaalissapput.
- Nunarsuup immikkoortua tamanna pingaarutilimmik inissisimaffeqarpoq, tassanilu nunavissuit immikkoortut pingasut naapipput, taamaattumik ersarippoq, nunat arlallit ussernartorsiorsinnaapput manna pigiumallugu.
- Issittumi sakkutooqarfinnik pilersitsinermut kajumissuseq, sakkutooqarfitsinnik nutarterineq, Moskvap sakkutuuisa aammalu Kinap annertunerusumik najuunnerat. Tamakku tamarmik takutippaat, unammilligassaq tamanna sortehav-imiit avannamut Atlantikup avannaanut atuuttoq.
- Taavalu ersarissumik takusariaqarparput, sumiiffiit tamakku tamarmik qanittumik ataqatigiipput. Taamaattumik Tysklandip ukioq kingulleq Issittoq pillugu politikkikkut anguniakkani pissutsinut nutaanut naleqqussarpai. Nunarsuup avannaani illersornissamut inissisimaffik pingaartinnerulerparput, nunarsuarmi niuernikkut kiffartuussineq pingaaruteqartoq. Tamatta pinngitsoorsinnaanngilarput kiffaanngissuseqarluni niuerneq aammalu isumannaallisaaneq tunngavigalugu attaveqaqatigiinneq, tyskit illersornissamut ministeriata tullersortaa ilaatigut taamak oqarpoq Nuummi tikeraarnermini.
- Tysklandimit sakkutuut imarsiortut umiarsuanik maaniitsitsikulanerulissaaq aammalu umiarsuit nutaat timmisartunik alapernaarsuutitaqartut maaniinnerulissapput, pingaartumik Atlantikup avannaani paasissutissanik nutarterisarneq eqqarsaatigalugu. Tamatuma Nato-p illersornissamut pilersaarusiornera tapersersussavaa illersornissamullu suleqatigiinnerup naalagaaffeqatigiit akornanni nukittorsaatigissallugu.
Troels: Aningaasaliissutit nutaat piariilerput
Illersornissamut ministeri Troels Lund Poulsen nalunaarpoq Issittoq aamma Atlantikup avannaa pillugit isumaqatigiissut nutaaq immikkoortoq II naammassineqalereersoq, namminerlu neriuutiginerarpaa ukiap aallartinnerani naammassineqarsinnaassasoq.
Troels Lund Poulsen innersuussivoq kikkulluunniit isumatigiissutigisinnaagaat, Issittumi isumannaallisaaneq allanngorsimasoq. Issittumillu soqutiginninneq nunarsuarmi tamarmi annertusiartorpoq, iliuuseqarfigineqartariaqarpoq, aamma tamanna pissutigalugu maaniippugut, ataasinngornermi ualikkut tusagassiortunik katersortitsinermi oqaaseqarnermini oqarpoq, nangillunilu:
- Aningaasaliissutissat nutaat misissorparput, neriuutigaaralu septembarimi ukioq manna Issittoq aamma Atlantikup avannaa pillugit isumaqatigiissut nutaaq pillugu isumaqatigiinniarnerit aallartissinnaassallugit.
- Aningaasat amerlanerusut atortariaqarpagut, aamma isumaqatigiissummi siullermi isumaqatigiissutigaarput, isumaqatigiissummi aappaanni aningaasat amerlanerusut atorlugit ingerlaqqinnissarput, neriuutigaaralu isumaqatigiissut aappaa septembarimi imaluunniit/imaluunniit oktobarip aallartinnerani naammassineqarsinnaanissaa. Tassa pilersaarutiga taamaappoq.
- Aammalu qujavunga tyskit sakkutuuisa imarsiortut umiarsuarsuata Berlinip maani Nuummiinneranut. Tamanna uppernarsaavoq Tysklandip Issittumi peqataaneranut. Kollegama Boris Pistorius, Tysklandip illersornissamut ministeria, juunip naalernerani juulillu aallartinnerani naapissinnaasimavara.
