Avannaata Qimussersuata Amerikamiut aningaasaliinissannik tusatsiakkat ilumuunnginnerarpai
Avannaata Qimussersua Amerikamiut aningaasaliiffigisinnaagaat oqallisigineqangaatsiarpoq. Jørgen Boassenip Kuno Fenckerillu namminneerlutik Washingtonimut angalaneranni Amerikamiut aningaasaliisartut Sisimiuni marsip 29-ani qimussimik sukkaniunneq tapersersorniaraat tusaamaneqalerpoq. Kisianni suli saaffiginnittoqarsimanngitsoq oqaatigineqarpoq.
Rune Bundgaard aamma Martin Svinkløv
Jørgen Boassen naapertorlugu USA-miinnermini aningaasaleeqataasinnaasut oqaloqatigisimavai:
- Aningaasaateqanngimmata aningaasatigut ikiuussinnaanerlutik aperipput, Frihedsbrevetimi januaarip 30-ani saqqummertumi issuarneqarpoq.
Trumpip silarsuaanni aningaasassarsiortorneq periusaasoq Jørgen Boassen Frihedsbrevetimut oqarpoq.
- Taamaattumik aningaasassarsiorniarsaraanga. Amerikamiut tapersersuerusupput.
- Sunniiniartartut peqataassasut naatsorsuutigaarput. Aamma filmiliortartut.
Tom Dans kalaallit sukkanniunnissaannut peqatigiiffini American Daybreak aningaasaliisussarsiortoq apersorneqarnermini uppernarsaraa Frihedsbrevet allappoq.
- Taamaaliornissamut iluaqutaasumik pilersaarusiorpugut, Dans oqarpoq.
Tom Dans Amerikamiuuvoq niuertoq Trumpillu Issittumi Ilisimatusarnermut Ataatsimiititaliarsuani siusinnerusukkut kommissæriusimasoq.
Qimusseq Sisimiut KNQK-lu: Tusagaqanngilagut
Qimusseq Sisimiut, ukioq manna Avannaata Qimussersuanik aaqqissuisoq, Sermitsiap attaveqarfigaa.
Amerikamiut aningaasaliiniarnerat tusarsimagaluarlugu Qimusseq Sisimiut USA-miit aningaasaliisoqarnissaanik saaffiginnittoqarsimanngitsoq paasissutissiivoq.
- Inuit attaveqaqatigiittarfiisigut taamaallaat tamanna paasivarput, toqqaannartumik saaffigineqanngilagut.
Jørgen Boassen Amerikamiulluunniit aningaasaliisut toqqaannartumik oqaloqatigineqarsimanngitsut Qimusseq Sisimiuniit aamma oqaatigineqarpoq. USA-miit aningaasaliissutinik tunineqassanerlutik Qimusseq Sisimiuni aamma eqqartorneqarsimanngilaq.
Mikkel Jeremiassen, KNQK-mi siulittaasoq, naapertorlugu kattuffik tamanna pillugu aamma tusagaqarsimanngilaq. Nunanit allaniilli aningaasaliiffigineqarnissaq ammaffigigitsik oqaatigaa — aningaasaleerusuttut peqatigiiffiup pingaartitaanut naapertuuppata.
- Aningaasaliiffigineqarnissamut ammavugut, apeqqutaavorli kikkut Avannaata Qimussersuanut tapersersuissanersut. Siornatigut Australiamit tapersersorneqarnikuuvugut, tamatigullu nalilersortarparput tamanna naapertuunnersoq, kina tapersersuinersoq aamma aningaasaliineq sunik imaqarnersoq, nassuiaavoq.
