Avatangiisinik illersuisoq sapaatip-akunneri pingasut sinnerlugit tigummigallarneqassaaq
Avatangiisinik illersuisoq Paul Watson Canadameersoq USA-meersorlu sapaatip-akunneri pingasut sinnerlugit Nuummi tigummigallarneqassaaq, Japanimut tunniunneqassanersoq aalajangerneqartinnagu.
Paul Watson sapaatip-akunneri pingasut sinnerlugit Nuummi tigummigallarneqassaaq, Japanimullu tunniunneqassanersoq danskit Inatsisinik Atuutsitsinermut Ministereqarfiata aalajangertussaavaa.
Miguel Medina/AFP/Ritzau Scanpix
Angut 73-inik ukiulik Sermersuup Eqqartuussiviani, Nuummiittumi, aggustip 15-ani eqqartuussisoqarnissaata tungaanut parnaarussaaqqavoq.
Tamanna illersuisuisa Ritzauimut uppernarsarpaat.
Tigusarinninnissamik peqqussut ukiunik 14-inik pisoqaassusilik
Paul Watson Greenpeacemik pilersitseqataasuuvoq akerleriissutaaqisumillu suliniaqataasarluni. 2010-mi Sikuiuitsumi kujallermi Japanimi arfanniat sulineranni akuliuttoqarnerani Paul Watsonip akuliunnera pissutigalugu, Japanimi tigusassatut nalunaarutigineqarpoq.
Avatangiisinik illersuisoq arfannianik saassussisimasoq niuernerannillu akornusersuisimasoq Japanimi oqartussaasut isumaqarput, tigusarinninnissamik peqqussutip kingorna The Guardian allappoq.
Ukiut 14-it qaangiuttut avatangiisinik illersuisup maanna 73-inik ukiullip tigusarineqarnissaa Japanip suli piumasaraa.
Taassuma tamanna pinaaserfigaa, eqqartuussissuserisuimi isumaqarput Japanimut tunniunnissaa Europami Inuit Pisinnaatitaaffii pillugit Isumaqatigiissummik unioqqutitsissasoq, eqqartuussissuserisui naapertorlugit Japanimi inuit pisinnaatitaaffii eqqortinneqanngimmata.
- Sullitatta iperagaatinnissaa sorsuutigissavarput, tunniussisoqarnissaanillu sumilluunniit kissaateqarneq sakkortuumik akerlerissavarput, François Zimeray, inuit pisinnaatitaaffiinik eqqartuussissuserisoq Paul Watsonillu illersuisuisa ilaat, Ritzauimut allakkatigut oqarpoq.
Aammattaaq Zimeray Frankrigimi inuit pisinnaatitaaffii pillugit ambassadøriuvoq, 2013-imiillu 2018-imut Danmarkimi Frankrig sinnerlugu ambassadøriusimavoq.
Inatsisinik atortitsinermut ministereqarfik aalajangiisuussasoq
Avatangiisinik illersuisoq tunniunneqassanersoq tunniunneqassannginnersorluunniit Inatsisinik atortitsinermut ministereqarfik aalajangiisuusussaasoq, Kalaallit Nunaanni Politiit ilisimatitsipput.
Tigummigallarneqarnera Nunatta Eqqartuussivianut suliassanngortinneqarpoq, maannalu taassuminnga aalajangiiffigineqassaaq.
Avatangiisit pillugit suliniaqatigiiffimmik Greenpeacemik 70-ikkunni Watson pilersitseqataavoq, kingornali taakku avissaarput, taassumallu periaasii suliniaqatigiiffiup akerlerilluinnarai Greenpeace oqarnikuuvoq.
Tamatuma kingorna suliniaqatigiiffinnut marlunnut Watson ilaasortaasimavoq — Sea Shepherds-imut kingullermillu Captain Paul Watson Foundation-imut.
Kingulleq eqqaaneqartoq Nittartakkamini ima allappoq: „Immami uumassusillit illersorniarlugit immikkut ittumik periaaseqarpugut, nakuuserneq atorlugu iliuuseqarnata, aamma unioqqutitsilluni immami uumasut pillugit sulianik akiuiniarluta iliuuseqartarpugut.
