Bidenip USA-p imartaani uuliamik qillerinerit inerteqqutigilerpai
Bidenip uuliasiornerup unitsinnissaanik aalajangernera Trumpimut ajoqutaasinnaavoq.
Uuliasiorfik “Esther” Californiami sissap Seal Beachip avataaniittoq januaarip 5-ani 2025-mi. Bidenip avataani uuliasiornerit arlallit akunnerit aqqanilissaani inerteqqutigilerpai. Demokraatineersoq præsidentiujunnaangajalerpoq. (Assi toqqorsivimmit).
Assiliisoq: Mario Tama/Ritzau Scanpix
USA-p præsidentiata Joe Bidenip, sapaatip-akunnialui qaangiuppata tunuartussap, USA-p sineriaata ilarujussuani immap naqqani gassimik uuliamillu qalluineq inerteqqutiginiarpaa.
Præsidentip illorsua ataasinngornermi nalunaarpoq.
Nutaarsiassaqartitsiviit arlallit — ilaatigut Reuters AFP-lu — naapertorlugit tamanna præsidentinngortussap Donald Trumpip allanngortikkuminaatsissinnaavaa.
Republikanerip, januaarip 20-ani præsidentitut ivertinneqartussap, USA-mi nukissiuutinik tunisassiorneq annertusarniarlugu neriorsuutiginikuugaluarpaa.
Inerteqqut Bidenip atuutilersinniagaa imartamut 253 millionit hektarinut atuuppoq, tassungalu ilaapput USA-p kangiata kitaatalu sineriaata avataani imartat naalagaaffimmut atassuteqartut, Mexicop Kangerliumarngata kangiata ilaa Beringillu imartaata ilaa Alaskap avannaatungaaniittoq.
- Inuiaqatigiit, suliffeqarfiit sissaliartartullu qangali nalunngeriigaannut aalajangernera takussutissaavoq: Avataani uuliasiorneq sumiiffinni qanittumiittuni aaqqinneqarsinnaanngitsumik ajoqusiisinnaanerat, Biden nalunaaruteqarluni oqarpoq.
Qillerinerit taamaattut USA-p nukissiornermut pisariaqartitaanut matussusiinissamut "pisariaqanngitsut" oqarpoq.
- Navianartorsiortinnissaq imminut akilersinnaanngilaq, oqarpoq.
Bidenilli aalajangernerani Mexicop Kangerliumarngani sumiiffiit annersaat, USA-p annertuumik piiaaffigisartagai, ilanngunneqassanngillaq. Nutaarsiassaqartitsivik AP allappoq.
USA-p pinngortitamik illersuinermut silallu pissusiata allanngoriartorneranut tunngatillugu anguniagai Bidenip anguniagaanit allaanerulluinnartut Trumpip aarlerisaarutiginikuuai.
Bidenip aalajangiinera USA-mi pilersuinerup isumannaatsuunissaanut ajoqutaassasoq, Kongressimillu allanngortinniarneqartariaqartoq uuliamut gassimut tunngasunik suliaqartut peqatigiiffiat oqarpoq.
- Politikerit politikkikkut aalajangiineq tamanna allanngortinniarlugu sakkussatik tamaasa atoqqullugit kajumissaarpavut, American Petroleum Institute-meersoq Mike Sommers oqarpoq.
Avatangiisinik illersuiniaqatigiit Oceanap tamanna Amerikamiunut sinerissami minguitsuunermik aalisarnermillu inuussutissarsiortut ajugaanerattut oqaatigaa.
Inatsit ukiut 70-it matuma siorna atulersinneqarsimasoq — Outer Continental Shelf Lands Act — tunngavigalugu Bidenip inerteqqut tamanna atulersinniarpaa.
Inatsit naapertorlugu præsidentit sumiiffinni aalajangersimasuni, assersuutigalugu immap naqqani qillerinernut, piiaanissaq unitsissinnaavaat. Eqqartuussivilli 2019-imi aalajangiinera naapertorlugu inatsisip tamatuma præsidentit aalajangiinernik taamaattunik tunuartitsinissamut pisinnaatitaaffilinngilai.
Donald Trumpip nammineq inatsisit atorlugit Mexicop Kangerliumarngani Floridap avataaniittumi uuliasiornissamut akuersissutit 2032-p tungaanut tuniniarneqarsinnaajunnaarsinnikuuai.
/ritzau/Reuters
