Nuannersumik takoqqittarneq

Ukiakkut ataatsimiinneq aallartikkaangat kuffertera poortortarpara Sisimiuniillu Nuummut aallartarlunga. 

Ilaquttakka qaammatini marlunni qimassimassallugit – tamannalu sivisuvoq. Illoqarfiit pingaarnersaata avataani najugaqaraanni atugassarititaasut taamaapput.

Sapaatilli akunnerani matumani immikkut ittunik pisoqarpoq. Nuliama panittalu nukarliup tikeraaraminnga. Kaffisorniartarfimmut kaffisoriarpugut, naluttarfimmut nalukkiarluta, ataatsimoornitsinnilu nuannisarluta – ataatsimiittoqarani, oqaluuserisassaqarani taasisitsisoqaranilu.

Ataasinngorpat angerlaqqissapput. Uangali suli maaniikkallalaassaanga, malugisinnaavarali tikeraarnerat ataatsimiinnerup sinneranut nukissaqalersitsisoq.

Ullaarortarneq atugassarititaasullu nutaat

Siumut qulinik ilaasortaatitaqaraluartoq, qinersinermi kingullermi sisamanik ilaasortaatitaqalerpoq. Tamanna uagutsinnut qinigaasunut suliassaqarnerulernermik kinguneqarpoq – qujanartumilli misilittagartuuvugut, suliavut ilisimalluarlugit immitsinnullu ilisarisimalluarluta.

Nammineq inuttut piareersarluarsimanissara nuannarisarpara, taamaattumik Inatsisartuni siullerpaat ilagalugit ullaakkut takkuttarpunga – amerlanertigut arfineq-pingasunut qiteqqunnerani. Taamaalinerani maani nipaattaqaaq, kaffiliuut kisimi qatimaajusappaluttarluni, eqqissillungalu ullormut oqaluuserisassat misissuataartarpakka.

Tassami ulloq aallartikkaangat pisoqarfiusartorujussuugami. Taamaattumik ullaat eqqissisimanartut pingaartittarpakka – tamakkiisumik isiginnissinnaalersarama, ullormilu oqallinnerit aallartinnginnerini eqqissisimasinnaasarlunga.

Peqatigilluarneq — aamma partiit akimorlugit

Inatsisartuni partiit torsuusaat anginngilaq. Immitsinnut qanilluta issiasarpugut, taamaalillutalu ilisarisimallualersarluta – aamma politikikkut isumaqatiginngisaraluit ilanngullugit.

Ullualuit matuma siornagut Anders Olsenip allaffianut pulaarama, tassanilu Demokraatit ilaasortaatitaasa ilaat issiaqatigalugit nuannisaqatigalugit. Assigiinngitsunik oqaloqatigiippugut illartarlutalu – naggataatigullu nereqatigiilluta.

Pisartut taamaattut pingaaruteqartorujussuupput. Politikikkut sammisat avataasigut nuannisaqatigiikkaangatta, ataatsimiittarfimmi suleqatigiinneq aamma pitsaanerulertarpoq. Tamatumani pineqarami tatigeqatigiinnissaq – aamma eqqaamaneqassalluni tamatta Nunarput pitsaanerpaamik sullikkusukkatsigu.

Tunuliaquttat nukittoqutigisavut

Naak Inatsisartunut ilaasortaatitavut ullumikkut ikittuinnaagaluartut, misigisimavunga tunuliaquttavut nukittuut siornatigornit suli annerusumik attaveqarfigilluartarivut.

Avannaanut tunngasumik siunnersuuteqartoqaraangat, nunap immikkoortuani tamaani immikkoortortavut sianerfigisarpavut qanoq isumaqarnersut – aamma pitsanngorsaatissanik sunik siunnersuutissaqarnersut paasiniarlugit. Tamanna aamma nunap immikkoortuinut Kujataanut, Tunumut aamma Kitaanut atuuppoq.

Taamaalillunga misigisimavunga nuna tamakkerlugu immikkoortortarpassuavut – piviusutut – Inatsisartuni ilaasortaatitatta tallimaralugillu arfinilerigaat. Taama tunngaveqarneq pingaarutilerujussuuvoq – aalajangiinerimmi sinerissami pissutsinik piviusunik tunngaveqaraangata pitsaanerusarmata.

Oqaluttarfimmi pissanganermit imminut tatigilernermut

Inatsisartuni oqaluttarfimmi siullermeerlunga nikorfaninni qanoq pissangatiginera malugisinnaalluarpara. Tamannami misigisaq angeqaaq – suleqatit, tusagassiortut kikkullu tamarmik saavanni nammineq isummanik oqaasinngortitsiniartoqartarami.

Ukiorpassuarni Inatsisartuni ilaasortaareerluni annilaanganeq eqqissisimanermik sungiusimasanillu taarserneqarsimavoq. Ullumikkut oqalugiaatip naammassiniapallannissaa pingaaruteqarnani oqariartuutip ersarissumik tutsuiginartumillu saqqummiunneqarnissaata pingaaruteqassusia pineqarpoq. Pingaartilluinnakkanik saqqummiussinissaq immikkut toqqissisimanartarpoq.

Tamatumuuna Nunatsinni illussanik titartaasarnermut politikimut siunnersuut pineqarpoq, — sammisaq uannut pingaaruteqarluinnartoq. Aap, oqaluttarfimmi oqalugiarnissara qilanaarilereerpara. Pissanganeq suli takkuttarpoq, maannali eqqissisimanarnerulluni. Oqaluttarfimmi qaqinermi pissangalaartarnissaq pisariaqartarpoq — taamaanngippat naammattumik pimoorussisoqarsimassanngimmat.