NUTARTIGAQ
Nuummi ujaasineq nangeqqinneqarpoq: Inuk ataaseq timmisartuaqqamiissimavoq
Timmisartuaqqamik nunamit allameersumik Nuup eqqaani ujaasineq ullumi nanginneqassaaq.
Issittumi Sakkutooqarfimmiit Naviair aamma Kalaallit Nunaanni Politiit suleqatigalugit ujaaseqataasoqarpoq.
Assi: Jesper Hansen
Nutartigaq: Naviairimiit paasissutissat nutaat ilanngullugit nal. 10.35 nutarterneqarpoq.
Nuup eqqaani arfininngornermi ualikkut ujaasineq aallartippoq.
Silaannakkut angallannermik nakkutilliisoqarfiup Naviairip Issittumi Sakkutooqarfik politiillu suleqatigalugit timmisartumik nunamit allameersumik Nuup eqqaani ajutoorsimasorineqartumik ujaasisoqartoq paasissutissiissutiginikuuaa.
Unnukkiartornerani silarlunnera pissutaalluni ujaasineq unitsinneqarpoq. Sila qaammarpat ujaasineq nangeqqinneqassasoq Naviar ullaaq maanna paasissutissiivoq.
Ukiuunerani nalunaaqutaq atuutilermat unnuaq akunnermik ataatsimik kinguartipparput, taamaammallu seqineq akunnermik ataatsimik siusinnerusukkut nuissalluni. Nuummi sapaammi nal. 08.52 nuissaaq.
Ujaasineq aallarteqqinneqarpoq
Sapaammi ullaap tungaani ujaasineq aallarteqqinneqartoq, Naviair nittartakkamini allappoq.
Nuissat appasippallaarmata qulimiguullit nalunaaqutaq 12.00-miit 13.00-ip akornanni aatsaat ujaasineqataalissasut naatsorsuutigineqarpoq.
Qeqertap Sermitsiap eqqaani ujaasineq pivoq.
Timmisartuaraq ataatsimik motoorilik Canadamiit Kalaallit Nunaannukartoq ataatsimik inuttaqartoq pineqartoq Naviairimit allapput.
Nuup avannaata tungaani qeqertap Sermitsiap eqqaani qulimiguullit timmisartullu arfininngormat ualisoq ujaasipput. Issittui Sakkutooqarfiup umiarsuaq nakkutilliissutaa Knud Rasmussen aamma sumiiffimmiippoq.
Pisoq Tusagassiorfimmit Sermitsiamit malinnaaffigaarput.
