Biilernermut allagartaq nutaaq: Allannguutissat pingaarutillit marluk
Nalunaarummik tusarniaassummik, nunatsinni biilertartussanut qallunaanullu biilertartunut Kalaallit Nunaannut nuuttussanut soqutiginartumik, Angallannermut Aqutsisoqarfik nassiussivoq.
Nalunaarut nutaaq aggustip aallaqqaataanit atuutilerpat, Danmarkimi biilersinnaanermut allagartaq siunissami Kalaallit Nunaanni akuerineqassaaq.
Assi: Leiff Josefsen
Biilersinnaanermut allagartamik pissarsiniaraanni siunissami teoriimik misilitsinnermi angusaqarnissaq pisariaqarunnaassaaq. Teoriimik misilitsinnermi angusaqarnissaq allattariarsornikkut misilitsinnikkut anguneqarsinnaalissaaq, tamannalu Kalaallit Nunaanni Politiinut aningaasartuuterpassuarnik sipaarfiussaaq.
Allannguut tamanna Kalaallit Nunaanni innuttaasunut iluaqutaassasoq naatsorsuutigineqarpoq, teoriimik misilitsinnissamut utaqqineq sivikinnerulissammat.
Qallunaat biilersinnaanermut allagartaat akuerineqassaaq
Qallunaat biilersinnaanermut allagartaat Kalaallit Nunaanni akuerineqarsinnaalissasoq, aammattaaq nalunaarummi siunniunneqarpoq.
- Qallunaat biilersinnaanermut allagartaannik piginnittut Kalaallit Nunaanni najugaqalerunik kalaallisut biilersinnaanermut allagartamik tunisittariaarunnissaannik tamanna isumaqarpoq, nalunaarutip imarisaanik itisiliinermi allassimavoq.
Tusarniaaneq juulip aappaani naammassisussaq akerlilerneqarani naammassineqarpat, allannguutit ukioq manna aggustip aallaqqaataani atuutilernissaat pilersaarutaavoq.
