Biilinik aallarussisoq ajutoorlunilu
Marlunngornerup unnuaani inuit pingasut Nuummi biilinik aallarussanik ajutoorput. Marluk tigusarineqarput.
Assiliisoq: Leiff Josefsen
Unnuap qeqqata qaangilaaraa nalunaaqutaq 00.18 Nuummi biilit aallarunneqarsimasut pillugit politiit nalunaarfigineqarput.
Biilit aqqusinermi 400-rtalimmi takuneqartut, sumiinnersullu paasiniarlugit politiit biilii ujaasitinneqartut, pigaartut pisortaat Jeppe Andsager Sermitsiamut oqarpoq.
Politiit biiliisa biilit nassaarigamikkit unitsinnialerpaat, biilinilli aallarussisoq qimaasimavoq:
- Biilertoq biilinik unitsitseqqullugu politiit kalerrippaat, biilertorli qimaanialerpoq.
- Qimaanermi biilertoq arlaleriarluni unioqqutitsivoq, ilaatigut qulleq aappalaartuusoq qaangiinnarlugu biilersimalluni, Jeppe Andsager oqaluttuarpoq.
Biilinik malersuinerup kinguneranik biilit aallarussat aqunneqarsinnaajunnaarput. Inuit pingasut qimaapput, taakkualu ilaat marluk politiinit tigusarineqarput.
Angut 20-nik ukiulik nukappiararlu 15-inik ukiulik pineqarput.
Pigaartut pisortaata oqaatigisinnaanngilaa taakkunani sorleq biilinik aallarussanik aquttuusimanersoq, kisianni biiliniissimanerat qularutissaanngilaq, taakkualu unnerluutigineqassapput.
