Biilit arlallit apornerisigut Qinngutsinnut aqqut matuneqarallaqqammerpoq
Biilit sisamat ataatsikkut imminnut apornerisa kingunerisaanik aqqusinermik matusisoqarallarpoq, maannali ammaqqinneqareerpoq. Politiit kaammattuipput biilertut pissutsit qanoq innerinik eqqumaffiginnillutik mianersornerullutik biilissasut.
Apummik oqitsumik nittaappoq, anorsaarneratalu malitsigisaanik biilertut isigisaqarniarnerannik annikillisitseqqavoq. Politiit nakkutilliisuisa pisortaata Carl Sværdip biilertunut kaammattuutigaa biilertut mianersoqqullugit pissutsillu qanoq innerannik eqqumaffiginneqqullugit, takusaqarsinnaaneq ilaannakuugallartillugu.
foto: Leiff Josefsen
Kalaallit Nunaanni Politiit nakkutilliisuisa pisortaata, Carl Sværdip biilertunut kaammattuutigaa isikkivik pitsaanngitsoq eqqarsaatigalugu ingerlaaqqullugit.
Tassunga pissutaavoq ualeq manna Qinngutta tungaanut aqqusinermi biilit arlallit ataatsikkut apornerisa kingunerisaanik.
Ataasinngornermi ualikkut biilit sisamat ataatsikkut apornermi pineqarput. Inuk ataaseq Dronning Ingrids Sundhedscenterimukaanneqarpoq, pineqartoq qanoq innersoq vagtchefip oqaaseqarfigisinnaanngilaa, kisianni ataatsikkut aportoqarnerata malitsigisaanik ima oqarpoq:
- Qinngutta tungaanut aqqusineq matoqqatikkallarnikuuarput, kisianni biilertartut suli mittarfimmut aqqusineq aqqutigalugu ingerlaqqarsinnaapput, iluarsaassineq suli ingerlanneqartillugu. Kisianni naatsorsuutigaarput aqqusineq qanittukkut ammarneqassasoq, vagtchefi oqarpoq.
Taamaapporlumi, allaaserisap matuma allanneqarnerani politiit fb-minni ilisimatitsipput aqqusineq ammaqqinneqarnissaminut piareersimammat maanna ammaqqinneqareersoq.
Kaammattuutigaa mianersortumik ingerlasoqassasoq
Aputip oqitsup nakkaanerani, aqquserngit ilaanni aputit sermeq asseqqasinnaavaa, tamatumalu saniatigut apummik oqitsuaqqamik nakkaasoqarneratigut anorsaarneratigullu isikkiveerunnartumik nittaappoq.
- Biilertartunut kaammattuutigissavarput pissutsinut naleqquttumik ingerlaaqqullugit aammalu sukkassutsinut killilersuutit angunngikkaluarlugilluunniit pisariaqarfiatigut arriinnerusumik ingerlaqqullugit, isikkiviup pitsaannginnera pissutigalugu, Kalaallit Nunaanni Politiini nakkutilliisut pisortaat, Carl Sværd, naggasiivoq.
