- Aalborgimiit Nuummut timmisartumik angalaneq akikinnerulerlunilu ajornannginnerulermat isornartorsiornissaanut pissutissaqanngilanga.
- Toqqaannartumik timmisartuussiffeqalernerput pitsaasuuvoq - aqqullu ajoriffissaqartinngilara. Pitsaasuuvoq.
- Aalborgimiit Nuummut timmisartumik angalaneq akikinnerulerlunilu ajornannginnerulermat isornartorsiornissaanut pissutissaqanngilanga.
- Toqqaannartumik timmisartuussiffeqalernerput pitsaasuuvoq - aqqullu ajoriffissaqartinngilara. Pitsaasuuvoq.
Taama oqarpoq Aalborgimi Kalaallit Illuutaanni pisortaq Jeppe Bülow Sørensen, DR-ip nittartakkamini sisamanngormat allaaserinninnerata kingorna, tassani allassimasoqarmat aqqut nutaaq aqqutigalugu Danmarkimut bilitsit akikitsut neqeroorutigineqartarmata aqqut nutaaq aqqutigalugu kalaallit atugarliortut amerlanerusut Jyllandip avannaani illoqarfiit pingaarnersaannut nuukkumaartut. Timmisartuussiffik nutaaq aqqutigalugu Aalborgimut angalaneq Københavnimut angalanermit akikinnerussaaq.
- DR-ip pisoq pinnagu pisumi ajoqutaasinnaasut sammineruai. Aalborgip Nuullu akornanni maanna timmisartuussineq ajornanngitsuusoq akikitsorlu nuannaarutigaarput. Aamma kalaallit tamarmik illutsinni tikilluaqqusaapput – inuiaqatigiinni qanorluunniit inissisimaffeqaraluarunik.
- Taamatut timmisartuussiffeqarlernikkut kalaallit ilinniagaqartut amerlanerusut illoqarfimmut tikittarnissaat neriuutigaarput. Ilinniartut ilarpassui mikisunik meeraqarput – ilaqutariillu tamarmik akikitsumik Kalaallit Nunaannut feriarsinnaanerat taakkununnga pingaaruteqarluinnarpoq. Aamma København aqqusaarlugu angalasariaarummata tamanna ilaqutariinnut meerartalinnut ingammik oqilisaataassaaq, Jeppe Bülov Sørensen oqarpoq.
Suliffeqarfinnut periarfissat pitsaasut
Thomas Hjort, Arctic Importimi pisortaq, aamma DR-ip allaaserisaanut aliasuppoq.
Arctic Importimi pisortap Thomas Hjortip DR-ip allaaserisaa aamma uggoraa.
- DR naleqqutinngitsumik ukkataqarniarluni aalajangersimavoq. Aqqummi taanna inuussutissarsiornermut taamalu Kalaallit Nunaanni Jyllandillu avannaani suliffissaqarnermut aningaasaqarnermullu pingaaruteqarluinnarmat tamanna alianarpoq.
- Timmisartuussiffeqalernissaa sulissutigisimaqaarput. Nuummi Aalborgimilu immikkoortortaqarfinni sulisorpassuaqarpoq - timmisartuussiffeqalermallu taakkua naapitsinissamut periarfissaqarnerussapput.
- Tamatuma saniatigut timmisartuussiffittaaq tapersersorniarlugu timmisartut avannamut ingerlaartut assartugassanut inissaqartinneqartussat affaat innimigiumallugit aalajangerpugut.
- Sisamanngornermi angalaqqaarnermini naatitaannik paarnanillu nutaanik umiarsuarpassuarnut takornariartaatinut sapaatip akunnerata naanerani Nuummi paarlaatsitsisussanut assartuinissamut inissat tamakkipajaarpagut. Pilersaarutit malillugit ingerlavoq pisariaqartitsinerlu annertooq pingaaruteqaqisorlu matussuserneqarpoq - taamaammat aappaagu, aamma ukioq mannamit sivisunerusumik, angalasoqaqqissasoq neriuutigaarput, Thomas Hjort oqarpoq.
Thomas Hjortip kissaatai piviusunngussagunarput.
- Tuniniarneq iluatsilluarpoq, aappaagulu timmisartuussisalissalluta ullumikkullu neriorsuisinnaavunga, Aarhusimi angalatitsiviup Ruby Rejserip pisortaa Morten Meyer oqarpoq, taannalu timmisartuussinermik ingerlatsisuuvoq, Air Greenlandilu timmisartuussinermi codeshare naapertorlugu suleqatigiinnissamik isumaqatigiissuteqarsimavoq.
