Binzer: Aalisarnermut inatsisissap suliarineqarnera anneruniarnermik aallaaveqarpoq
Aalisarnermut nutaamik inatsisitaarnialersaarfimmi, Polar Seafoodimut pisassiissutit pingajorarterutaannik ikilisitsisussamik, suliffeqarfiup namminersortunik pigineqartup kilisaammut nutaamut 650 millionit koruuninik aningaasaliiniarneq taamaatippaa.
Annonse
Polar Seafoodip siulersuisuini siulittaasup Michael Binzerip inuussutissarsiutit pingaarnersaannut inatsisitigut sinaakkutissaanik siunnersuutip suliarineqarnera pakatsissutigeqaa: aalisarneq.
- Naalakkersuisut aalisarnermik inuussutissarsiuteqartunik tusarnaarusunngillat oqaloqateqarusunnatillu, naak nalunngikkaluarlugu tamanna Kalaallit Nunaannut qanoq pingaaruteqartigisoq, Michael Binzer Sermitsiamut oqarpoq.
Inatsisissatut siunnersuut inuiaqatigiinnut aningaasaqarnikkut kingunerisinnaasai sukumiisumik misissorneqanngitsut aqagu sisamanngornermi siullermeerneqarnissaanut Naalakkersuisut siunnersuuteqarnerat tupigusuutigaa.
Aningaasaliiniarneq nalunartoq
- Inatsit akuerineqarpat aningaasat milliardit koruunit missaat inuussutissarsiummut aningaasaliissutigineqassapput. Aningaasat taakku suminngaanneerniartunuku, aperaaq.
- Naalakkersuisut isumaqaqqaarsimagaluarput soraarnerussutisiassanut aningaasaateqarfik SISA aningaasaliisinnaassasoq, paasinarsivorli aningaasaateqarfik millionilikkaanik inuussutissarsiummut aningaasaliisinnaanngitsoq, killilersuisoqarmat. Aningaasalli sumit pissarsiarineqarsinnaanissaannik pilersaarummik allamik sanasoqarsimanngilaq, Michael Binzer oqarpoq. Nunami politikkikkut siuttut inuiaqatigiinnik rusinamik rulettemik pinnguartut taanna isumaqarpoq.
Michael Binzerip aalisarnermut inatsit Polar Seafoodimut inatsisitut isigaa, tassami Polar Seafood kisimi pisassiissutinik annertuunik tunisinermigut eqqugaasussaammat. Tusarniaasoqareerneranit inatsisissatut siunnersuut naleqqussarneqarpoq taamaaliornikkut ilaqutariit Christensenikkut pisassiissutinik killilersuiffigineqaqqunagit.
Inatsit tunngaviusumik inatsimmut naapertuutinngila?
Inatsimmut tunngaviusumut inatsisissatut siunnersuut naapertuuttoq Naalakkersuisut siunnersuutip oqaaseqaataani naqissuserpaat, tamannali Polar Seafoodip isumaqatiginngilluinnarpaa. Tusarniaanermi akissutit 44-t akornanni kalaallit aningaaserivii, eqqartuussissuserisut, kukkunersiuisut kiisalu inuussutissarsiortut kattuffiat Sulisitsisut arlalitsigut mianersoqqussuteqarput. Eqqaaneqartut amerlasuut Nalaakkersuisut soqutiginngilaat, tassami Inatsimmut siunnersuut inaarutaasumik saqqummiunneqarmat.
- Inatsisitigut qanoq kinguneqassanersoq maannakkut misissorpavut, suliarlu naammassippat aatsaat taarsiissuteqarnissaanik suliamik aallartitsissanerluta aalajangiiffigissavarput, Michael Binzer oqarpoq.
Aalisakkanik suliffissuaq matuneqarsinnaasoq
Polar Seafoodip Aasianni aalisakkerivik suliffissuaataa 70-it missaanniittunik sulisulik qanoq ingerlatiinnarsinnaanerlugu takusinnaanngikkaa ilanngullugu eqqaavaa. Suliffissuarlu matuneqassappat illoqarfik eqqugaassanerarlugu.
