Trumpip qinigaaffiup qiteqqunnerani qinersineq peqquserluffiusimanerarpaa

USA-p præsidentiata Donald Trumpip amerikamiut qinigaaffiup qiteqqunnerani qinersineranit inernerit tatiginassusai apeqquserpai.

Tusagassiorfiutimini Truth Socialimi taamaaliorpoq.

- Ilumut inoqarpa “qinersinerup” eqqortumik ingerlasimeranik upperinnittunik. Misissuinerit qanoq ilillutik taamarsuaq kukkuneqarsinnaappat, allappoq nangillunilu:

- “Taasinerit” siulliit ilaat (dumpsit, aaqq.) ima amerlatigipput, qanorluunniit amerlatigisut taasigaluarpata ajugaasoqarsinnaanani. Maskinat kisimik pineqarput, taakku qinersisartuniit pingaarnerupput!

Amerikamiut præsidentiata qinersinerup inerneri aallaqqaammut akuerisimagaluarai AFP allappoq.

-Aalajangerpunga inernerit akueriniarlugit, qinersinerup unnuaani taama oqarpoq.

Qinersinerit siuliini peqquserluttoqarsimaneranik passilliilluni Trump oqaaseqartareerpoq.

Taama ilaatigut aamma pisoqarpoq 2020-mi qinersinermi, tassani præsidentiusimasumut Joe Bidenimut ajorsarpoq.

Republikanerit partiiata qinigaaffiup qiteqqunnerani Kongressip immikkoortuini marlunni – Sinniisoqarfimmi Senatimilu – amerlanerussuteqarnertik annaavaat – taakkunani marlunni Demokraatit amerlanerussuteqarlermata.

Inernerit naalagaaffinnit marlunneersut – Alaskamiit aamma Mississippimiit suli amigaataapput. Kisianni Senatimi inissanit 100-sunik amerlanerussuteqarlutik 56-it pissarsiarinissaat Demokraatit neriuutigaat.

Senatimi Sinniisoqarfimmilu Republikanerit amerlanerussuteqarunnaarnermi saniatigut, naalagaaffinni arlallinni, partii ukiorpassuarni amerlanerussuteqartuarsimagaluartoq, oqaluttuarisaanermi aatsaat taamma angusarliortigaaq.

“USA-p oqaluttuarisaanerani kinguariarnerujussuusoq” Donald Trumpip sapaammi oqaatigaa,

-Aktianik tuniniiavik allaat Trumpip nalaani qaammammuliartartutut ingerlasimasoq, 3 billionit dollarinik ullormi ataatsimi annaasaqarfiuvoq, Truth Socialimi allappoq.

- Ersissanngilasili, uteqqikkumaarpugut. Annerulluta nukittunerungaarlutalu, taama oqqarpoq.

Iranmii sorsunneq ajorsarnermut ilaatigut peqqutaagunartoq nassuerutigaa.

RITZAU