Sussat! tusarnaarneqarnerpaasut

Pop/rockertartut Sussat! saqqummersitartik siulleq »Sila Qaammareerpoq« 2010-mi saqqummersimmassulli torluuserlugu nipip qarmarsua qaartinneqarpoq, siuttuat taalliortoq erinniartorlu John G. Sandgreen nuna tamakkerlugu uteqattaartuakkanik suli sanaartussaqqaarpoq.  

Saqqummersitaat »Silarsuaq misigiuk« 2025-mi tusarnaarsinnaalerparput, normullu arfinillit tamarmik Kalaallit Nunaannit streamerisarfimmi Tusass Musicimi ukioq taanna tusarnaarneqarnerpaat qulit akornanniipput. (Paasissutissat takukkit).

Attaveqqaatinik allakkeriveqarnikkullu ingerlatsivik Tusass 2023 streamerivimmik, kalaallit nipilersugaannaanik tusarnaarfissamik pilersitsivoq, Tusass Musicilu ullumikkit 10.000-inik atuisoqarpoq, taakkulu niplersukkanik 6.000-inik nipilersortartunit 780-init atorneqartunik tusarnaarsinnaapput. Atuisuuneq qaammammut 49 koruuneqarpoq, sinneqartoorutillu nipilersortartunut tusarnaarneqarsinnaasunut tunniunneqartarput.

-Tusarnaarnerit ataasiakkaarlugit akilerneq ajorpagut, kisianni periuseq »user centric« atorlugu akiliisarpugut. Tassa imaappoq atuisup akiuliutaa, inuup taassuma nammineq tusarnaagaanut ingerlateqqinneqartarput. Atuisut 10.000-it sinneqarmata, 2025-mi agguqatigiissullugu tusarnaarneq ataaseq 14 øreqarpoq, taamaalilluni Tusassip tre millionit koruunit sinnilaarlugit kalaallinut nipilersortartunut utertippat, Allan Pertti Frandsen, frimærkechefiusoq Sermitsiamut oqarpoq.  

Tusass pillugu Tusass-frimærkit

Frimærkit nutaat marluk Tusassimeersut suliffeqarfiup nammineq suliaanut tunngasuupput, tassa Coding Class aamma Tusass Music.

Coding Class 2020-miilli atuarfinni, meeqqat inuusuttullu digitalikkut aaqqiissutinik atuiinnaratik nammineq aaqqiissusiorsinnaaniassammata programmeriineq teknologimillu paasinninneq ilinniartitsissutaasalerpoq. Digitalimik piginnaasanik ineriartortitsinermillu ukiumoortumik unammisitsinermik naggaserneqartarpoq.

Frimærkit taakku marluk Maja-Lisa Kehletimit, sisamassaa tallimasaalu Tusassimut frimærkiliortumit, suliarineqarput.

Ukiut qulit Nuummi Nuussuup Atuarfianeereerluni, ukiullu pingsut Skivemi ilinniarnertuunngorniareerluni 2012-miit 16-imut The Animation Workshopimit Viborgimiittumi ilinniarpoq. Sulinermigut nunat tamalaat akornanni ingerlalluarnermi saniatigut Maja-Lisa Kehlet atuakkanik saqqummersitsivimmut Mlimmut suliaqartarpoq, Juaaka Lyberthip juullimi oqaluttualiaa »Orpilissat nunarsuarmi kusanarnersaat« ilaatigut assiliartalersorpaa.