Rina Pape Kofoed Kalaallit Nunaannut sinniisuussaaq

Rina Pape Kofoed, Greenland Business Schoolimi ilinniartoq, The Overseas Countries and Territories (OCT) Youth Networkimi Kalaallit Nunaannut sinniisuussaaq.

Inuusuttut 25-t nunanit 13-ineersut, EU-mut ilaasortaanngitsut, Europamili nunanut oqaluttuarisaanikkut politikkikkullu attuumassuteqartut, attaveqaqatigiittarfimmut peqataapput. Kalaallit Nunaata saniatigut ilaatigut Arubameersut, Fransk Polynesiameersut Sabameersullu ilaasortaapput.

- Politikki soqutigigakku OCT Youth Networkimut qinnuteqarpunga peqataarusullungalu, Rina Pape Kofoed Sermitsiaq.AG-mut oqarpoq.

OCT Youth Networkimi peqataasut EU nunallu 13-it allat pillugit nutaanik ukiuni tulliuttuni ilikkagaqassapput.

Bruxellesimi Europami Kommissionimut paasisassarsiorlutik ilaatigut angalassapput, EU-milu politikerit naapillugit. Peqataasullu soorunami imminnut ilisimasarilerlutillu misilittakkaminnik avitseqatigiissapput.

Rina Pape Kofoedip Kalaallit Nunaata EU-mut attaveqarnera annerusumik eqqarsaatigisimanngilaa, aatsaalli ullut ilaanni ilinniarfia, EU-mi politikkerinit atorfilittanit assigiinngitsunit pulaarneqarnerata nalaani alapernaasersorfigilerpaa, tamannalu pissutigalugu Kalaallit Nunaata EU-llu suleqatigiinnerat paasilluarnerujumavaa.

- Oqaaseq EU tusartarparput, sunaava qanorlu sunniuteqartarpa?

Inuusuttut sunniuteqarnerulernissaannut periarfissaqarnerulernissaannullu periarfissiineq Rina Pape Kofoedip OCT Youth Networkimut peqataanissaanut piumassuseqalersitsivoq

- Inuusuttut inuunitsinnullu ulluinnarni sunniuteqartunut tunngatillugu tusarneqartariaqarput, oqarpoq.

Rina Pape Kofoedip neriuutigaa OCT Youth Networkimi ukiumi ataatsimi peqataareerluni siunissami Kalaallit Nunaat sinnerlugu nunani allani angalanissamut piareersimalluni – inuusuttutullu Tasiilameersutut isumaminik tapersersuisinnaalluni

- Tunumi misilittakkakka Kalaallit Nunaannut tamarmut iluaqutaasumik atorsinnaanera uannut pingaaruteqarluinnarpoq, Rina Pape Kofoed oqarpoq.

OCT Youth Networkimi inuusuttut 20-t 28-llu akornanni ukiullit katillugit 25-upput, taakkulu makkuninngaanneerput: Aruba, Bonaire, Curaçao, Fransk Polynesia, Franskit kujataani nunaat aamma Nunat Sikuiuitsoq kujalleq, Kalaallit Nunaat, Ny Kaledonie, Saba, Saint Barthélemy, Saint Pierre aamma Miquelon, Sint Eustatius, Sint Maarten kiisalu Wallis aamma Futuna.

Rina Pape Kofoedip saniatigut Hanne Louise Panituaq Petersen, Ilisimatusarfimmi inatsisilerinermik ilinniagaqartoq, aamma Bea Petrussen, Ilisimatusarfimmi kulturimik inuiaqatigiillu oqaluttuarisaanerannik ilinniagaqartoq, Kalaallit Nunaat sinnerlugu OCT Youth Networkimi 2026-27-mi ilaasortaapput.

Taakkua attaveqaqatigiittarfimmullu ilaasortat allat pillugit amerlanerusunik uani paasisaqarfiginerusinnaavatit.