KOMMUNE KUJALLEQ
Borgmesteri amerlanerussuteqaqqalaartunik tatigineqarpoq
Kommune Kujallermi taasisitsinerup kingorna uppernarsarneqarpoq borgmesterimut tatiginninneq suli attaneqartoq - tassa kommunalbestyrelsemi ilaasortat arfineq pingasut tatinninnerminnik nalunaarput arfinillillu tatiginnikkunnaarnertik attallugu borgmesterillu tunuarnissaa suli piumasaralugu.
Borgmesterip taasisitsinermi kommunalbestyrelsimi ataatsimiittarfimmit aninissani toqqarpaa, taginnikkunnaarnermik taasisitsineq ingerlanneqarmat. Taasineq 8-6-imik inerneqarpoq. Tamanna isumaqarpoq Demokraatit IA-mik suleqateqarnertik kipitittussanngussagaat.
Asseq: Kommune Kujalliup Youtubekanaliaaneersoq
8-6 taasineq taamak inerneqarpoq. Tassavorlu tatiginninneq, borgmesterip Stine Egede (IA) ullumi tatiginnikkunnaarnermik Kommune Kujallermi kommunalbestyrelsip taasitinneqarnerata kingorna angusaa.
Kommune Kujalleq-mi kommunalbestyrelsemi ilaasortat 15-iupput, borgmesterilu taaseqataanngilaq.
Borgmesterip kommunip allattoqarfianit aningaasaqarnikkut aqutsineq nakkutigisassaralugu qanoq ingerlanneqarnersoq arajutsisimasinnaavaa, massa kommunit aqunneqarnerat pillugu inatsimmi malittarisassat malillugit borgmesteri nakkutilliinissamut pisussaaffeqaraluarluni?
Taanna apeqqut Demokraatit Kujataani kommunimi allagartamik aappaluttumik nittarsaassinerannik kinguneqarpoq.
Demokraatit, Kommune Kujallermi Inuit Ataqatigiit suleqatigivat, taakku piumasaqarput suleqatigiinneq ingerlaannassappat, taava borgmesteri tunuartariaqartoq IA-lu borgmesterissamik allamik sassartitsisariaqartoq.
Kommunaldirektøri aamma annertuumik isornartorsiorneqarpoq
Kommunaldirektøri kommunalbestyrelsimit atorfinitsinneqartarpoq, aamma Demokraatit taamaattumik apeqqut ilannguppaat, tassa kommunaldirektøri Tina Pars soraarsitaassanersoq, Demokraatit naapertorlugit akisussaaffimminik annertuumik sumiginnaasimammmat.
Kisianni kommunalbestyrelsip oqaluuserinninnerani suli tassunga killittoqanngitsoq, borgmesteri inassuteqartoqarnera malillugu aalajangerpoq, ataatsimiinnerup sinnera matoqqasumik ingerlanneqassasoq.
Bibi Kielsen (IA): Borgmesteriusimasuuguma tunuarsimassagaluarpunga!
Inuit Ataqatigiit iluani aalassaqqasoqartoq arajutsisassaanngilaq, tassami Bibi Kielsen sakkortuumik borgmesterimut isornartorsiuivoq. Kommunalbestyrelsimi ataatsimiinnerup ammasup ilarujussuani taassuma parteeqataani, borgmesteri Stine Egede, tatiginassuseqarneranik aqutsinissamillu piginnaasaqarneranik apeqqusersuilluni isornartorsiorpaa.
- Uanga borgmesteriusimassagaluaruma aamma uanga aningaasaqarnikkut ajornartorsiortitsisimasuugaluaruma, borgmesteritut nammineerlunga tunuarsimassagaluarpunga, Bibi Kielsen ilaatigut oqarpoq.
Kisianni taannaannanngilaq, Bibi Kielsen aamma borgmesterimut isornartorsiuvoq kommunalbestyrelsimi ilaasortat apeqquteqaraangata akissutai suusupaginnippalaartuunerarlugit qaangiataariniartutullu pissusilersornerarlugu kommunalbestyrelsimi suleqatiminut.
Taamaakkaluartoq Bibi Kielsen IA-gruppi peqatigalugu taasivoq tunngavilersuutigalugu partiiminnik aserorsaasoorusunnginnini.
