Borgmesteri Atassutip isornartorsiutaanut akivoq: Nikotininik atuinermut inerteqquteqalerneq nalilersorneqassanngilaq
Qeqqata Kommuniani sulinerup nalaani snusitoqqusinnginnissamik aalajangiineq Atassutip Inuusuttaasa Kattuffianni isornartorsiorpaat. Siulittaasup Angutinnguaq Schmidtip kommunalbestyrelsi kajumissaarpaa aalajangerneq nalilersoqqeqqullugu, isumaqarami sulisut kiffaanngissusiannut akuliunneq ingasappallaartoq. Borgmesterip Malik Berthelsenip kajumissaarut itigartippaa ersarissumik akissuteqarluni: "Naamik".
Foto: Leiff Josefsen
Qeqqata Kommuniani snusitoqqusaajunnaarnermut aalajangerneq nalilersorneqartariaqarpoq, taama Atassutip Inuusuttaasa Kattuffianni siulittaasoq, Angutinnguaq Schmidt kajumissaruvoq.
Borgmester Malik Berthelsenili (S) naatsumik ersarissumillu akivoq:
- Naamik.
Qeqqata Kommuniani borgmesterip Malik Berthelsenip kommunalbestyrelsip aalajangernera aalajangiusimavaa erseqqissarlugulu kommunimi peqqissuunissaq anguniarneqartoq, nikotinimik akulinnik nioqqutissat soorlu snusinik atuineq killilersimaarneratigut.
- Nikotinip inuunerput sulinerpullu aquttussaanngilaa, uagut inuiaqatigiittut nunatsinni tupanik atuineq aquttussaavarput, Malik Berthelsen oqarpoq.
Oqallinneq illuinnaasiortoq
Tupa pillugu inuiaqatigiit oqallinnerat illuinnaasiorpallaarnerarlugu, borgmesteri isornartorsiuivoq.
- Uggorivara Qeqqata Kommuniani pujortaqqusinnginnerup oqallisaanera illuinnaasiorpallaarnera. Allaanngilagut inuup inuuneranik ajortorujussuarmik sunniuteqartummik aalajangiisimasugut, naak inuiaqatigiit peqqinnerulernissaanik siunertaqaraluartugut.
Isornartorsuinermut akissuteqarluni inuiaqatigiinnut apeqquteqarpoq:
- Tupamik atuineq annikillisissagutsigu, inuiaqatigiinnut qanoq sunniuteqassava?
Borgmesteri isumaqarpoq inerteqquteqarnerup inuit peqqissusaannut akisussaaffimmik tigusinissaq aamma suliffimmi avatangiisit peqqinnarnerulernissaat siunertarigaa, sulisut kiffaanngissusiannik killilersuinissaq siunertarinagu.