Borgmesteri: Timmisartumik angallannerit sooq taamak akitsortigippat?

Qeqqata Kommuniani borgmesterip Malik Berthelsenip paaserusuppaa Nuuk Sisimiullu akornanni timmisartuussinermi akit sooq qaffariarsimanersut.

Tusagassiuutinut nalunaarutimini nassuiaavoq Sisimiut Nuullu akornanni siorna 2023-imi timmisartuussinerit 2.590 koruuneqarsimasut, timmisartoqarfimmut akitsuutit ilaareerlutik. 

Ullumikkullu billetsit 4.044 koruuneqarpoq, ukiup ataatsip ingerlanerani qaffariarsimalluni,  taakku piffissaalluartillugu naliginnaasumik billetsisinikkut pisiaapput.  

Borgmesteri nassuiavoq Air Greenlandip Takuss billetsiinut tunngatillugu akit 2023-miit 2024-mut siumuinnaq billetsi 718 koruuninik kiisalu siumut utimullu angalaneq 1.436 koruuninik qaffaavigineqarsimasut, tassa imaappoq 43% qaffariaateqarsimallutik.

Nassuiaasoqartariaqartoq

Taamaattumik Naalakkersuisut nassuiaasariaqartut isumaqarpoq.

-  Nunarsuaq tamakkerlugu timmisartup orsussaa ukiumut 10,3 procentimik appariaateqartaraluartoq, Nunatsinni Air Greenlandip billetsiisa akii marloriaatingajammik qaffanneqarput.

-  Taamaattumik akitsoraluttuinnarnerit sumik peqquteqarnersut innuttaasunut nassuiaatigineqartariaqartoq isumaqarpunga. Isumaqarpungalu akit taamak qaffasitsigitillugit innuttaasut nammineq akilikkaminnik angalanissaminnut periarfissaat killeqareeqisut suli ajornarnerulersut.

Sisimiuniit Nuummut timmisartuussinermut akit kisimik qaffariaateqanngillat, borgmesteri naapertorlugu Maniitsumit Nuummut aamma akitsorput.