Aalisarnermut
piniarnermullu Naalakkersuisoq aalisarnermut inatsisip akuerineqarnerata kingorna ulapittussanngorpoq.
PISARTAGAQARTUNUT
Allaaserisaq una Nutaarsiassaqartitsivimmi aviisit naqitat
ilaanni allaaserisaavoq.
Allaaserisat pisartagaqartunit siunissami taamaallaat
atuarneqarsinnaajumaassapput.
Atuarluarna.
– Maanna nalunaarutinik assigiinngitsunik suliaqarneq aallartittussanngorpoq, taama Kim Kielsen sisamanngornermi kingullermi ataatsimiittarfimmi taasinerup kingorna qisuariaateqarluni oqaaseqarpoq.
Nalunaaquttap akunnerini arlalinni oqallinnerup, Atassummillu tatiginninnginnermik taasititsinerup naalakkersuisooqatigiillu pinngitsoortitsiniarlutik taasititsinerisa kiisalu inatsimmik naggataarutaasumik taasissutiginnereernermi, Inuit Ataqatigiit Siumullu Inatsisartuni ilaasortaanit Kim Kielsen pakkutaarneqarlunilu assamminneqarpoq.
– Naalakkersuisut siunnersuummik saqqummiussipput, isumaliutissiissusiortoqarlunilu siunnersuummut allannguutissatut siunnersuutit 20-t sinnilaarlugit amerlassusillit saqqummiunneqarput.
- Taakku tunuliaqutaralugit Inatsisartuni ilaasortat 21-t inatsimmik akuersipput, maannalu suleriaqqinninni taakku malissavakka. Suliassaqarfinni assigiinngitsuni inatsimmi ikaarsaariarnermut periarfissaqarpoq, Kim Kielsen oqarpoq.
Aalisarnermut inatsimmi nutaami ilaatigut aalisarnermi kalaallit tamakkiisumik piginnittussaanerannik, avataasiorluni aalisarnermi pisat annertunerpaaffissaannik pisassallu piffissami killilimmi pigineqarnissaannut piumasaqaateqarpoq.
Taakku saniatigut pisassat ataasiakkaanit pigineqartut nioqqutigineqarsinnaasut atulersinneqarput, qaleralinniarnermut tunngatillugu immikkoortoq 47-mi ilaannakortumik.
Taamattaarlu Royal Greenlandip pisassai ikilineqassapput, tamannali annertussusilerneqarnanilu piffissalerneqanngilaq.
Tamat oqartussaaqataanerannik aarlerinartorsiortitsineq
Avannaata Kommuniata borgmesteria Palle Jeremiassen aalisarnermut inatsisip akuerineqarneranik, maannalu ulloq 1. januar 2025 atuuttussanngornissaanik iluarisimaarinninngilaq.
– Aalisarneq aarleqqutigaara, borgmesteri oqarpoq, taassumalu aalisarnermut inatsisip kinguneqaatissaanik misissueqqissaarnernik amigaateqarneq kommuniani Ilulissanit Qaanaamut illoqarfinni nunaqarfinnilu 912- inik umiatsiaararsorluni aalisartoqartunik eqquisussaq isornartorsiorpaa.
Borgmesteri naapertorlugu aalisarnermut inatsit Ilulissani raajaleriffimmik Royal Greenlandimit pigineqartumik, Avannaatalu Kommuniani tunitsivinnik tunisassiorfinnillu matusinermik nassataqarsinnaavoq.
– Innuttaasut nilliapput. Suliffeqarfiit inuiaqatigiillu iluatsinngitsumik aalisarnermut inatsisissap kinguneqaatissaanik nalilersuinernik ujartuipput, Inatsisartulli Naalakkersuisullu tusaaniarsimanngillat, tamannalu tamat oqartussaaqataanerannut navianartorsiortitsivoq.
- Suliami uani aalisarnermut inatsisissap tusarniaassutigalugu suliarineqarnerani oqallisigineqarneranilu Inatsisartunut Naalakkersuisunullu tatiginninnera annikillivoq.
Ilulissani raajaleriffik
Aalisarnermut inatsisissap tusarniaassutigineqarneranut atatillugu Avannaata Kommunia inatsisip imarisaanik siunertaanillu paasinninnissamut ilisimatusartunit inatsisilerituunillu ikiorneqarpoq.
– Siullertut aalisarnermi piujuartitsinermik periutsip atuutilersinneqarluni TAC-p appartikkiartorlugulu aalisagartassiissutit appartinnerisigut, kommunimi akileraarutitigut isertitavut 30 million koruuninik appariassapput. Tamatumalu saniatigut nunami tunitsivinnut tulaassissussaatitaaneq apparneqassappat, taava tunisassiorfinni sulisut soraarsinneqarlutik angerlartinneqassapput, taamaalillunilu aningaasartuutigut qaffallutik.
- Ataasiaannarlutilluunniit tusaanianngillat, Palle Jerimiassen oqarpoq imalu nangilluni:
– Polar Seafoodip Aasianni tunisassiorfia annertuumik sammineqartoq maluginiarpara, allaanngilarlu Inatsisartut Naalakkersuisullu Avannaata Kommuniani tunisassiorfinnik piaaralutik taasaqarnaveersaartut. Ilulissat raajaleriffeqarpoq, raajarniarnermilu tulaassisussaatitaanerup apparneqarneratigut Ilulissani tunisassiorfiup matuneqaratarsinnaaneranut aarlerinartoqarpoq, tamannalu pillugu Royal Greenlandimi siulersuisut pisortaqatigiillunniit inatsit takutinnagu oqaaseqarsinnaasimanngillat, Palle Jerimiassen nassuiaavoq.
Matusinerit
Raajarniarnermi pisassat 20 procentimik annerpaaffilerneqarnerat, Aasianni Polar Raajat tunisassiorfiata ukiut pingasut qaangiunneranni matuneqarsinnaaneranik kinguneqassasoq, Polar Seafoodip Inatsisartut aalisarnermut inatsisissamik suliaqarnerisali nalaanni oqaatigereerpaat.
Maannalu Kim Kielsen matusinissat pinngitsoortinniarlugit aaqqiissutissarsiussasoq Inatsisartunit peqquneqarpoq.
– Polar Seafoodip tunisassiorfimmik ukiut pingasut qaangiuppata matusinissani oqaatigaa. Aalisarnermut inatsit ukiuni qulini ikaarsaariarfissiivoq. Maannalu suliffeqarfinnik namminersortunik matusiniarnerannut toqqaannartumik naapitsilluni oqaloqatiginninnissaq pingaarnerpaavoq.
- Tamanna tusagassiuutitigut ingerlanneqassanngilaq, Kim Kielsen oqarpoq, taassumali matusinissat pinngitsoortinniarlugit qanoq iliorsinnaanini itisilinngilaa.
Jens Kristian Therkildsen (Siumut) Uummannap eqqaaneersoq Inatsisartuni ilaasortaavoq. Taanna nalorninngivilluni inatsimmik akuersivoq, taassumami aqutsiveqarfik 47-mi qaleralinniarnermi pisassanik niuerutigineqarsinnaasunik atulersitsinissaq pitsaasunik periarfissiisoq takusinnaavaa.
– Ataatsimut isigalugu inatsit amerlanerit aalisarnermut ikaarsaasinnaanerannik periarfissiivoq, tamanna avataasiorluni aalisarnermi kiisalu sinerissap qanittuani aalisarnermi.
- Aalisartut periarfissaqarlualissapput, taakkumi akuersissutaataat maanna 0 procentiusut naleqanngillat. Taakkuli pisassanut niuerutigineqarsinnaasunut ikaarsaarnermikkut procentikkaartumik agguakkanik pisassaqalissapput, taakkulu aningaasaliinerminni qularnaveeqqutigisinnaavaat.
- Taakku ungasinnerusumut isigisumik aalisarnerminnik pilersaarusiorsinnaalissapput, Jens Kristian Therkelsen oqarpoq.
Pisassat tammarsinnaanerannut aarlerinaat
Avannaatali Kommuniani borgmesteri taamak qulanngitsiginngilaq:
– Pisassat niuerutigineqarsinnaasut kommunitta avataaneersunit pisiarineqarpata qanoq pisoqassava? Umiatsiaararsortortavut 912-it paggatassiissutinik aalisartut aarlerigaakka, taakunannga qanoq amerlatigisut pisassat appariartorneranni aalisarnermik inuussutissarsiorunnaassappat? Aalisarnermik inuussutissarsiorneq inuuneraat.
- Allanik inuussutissarsiorfissaqartinnagu nunami sulerissappat? Kiffaanngissuseqarlutik aalisartutut inuupput. Naalakkersuisut arlaannaataluunniit inunnut aalajangersimasunut pisassiissutit eqqartunngilaat.
- Aalisartut qanoq amerlatigisut nunamut qaqisariaqarumaarnerannik illuatungiliuttut apeqqarissaarluarput, taakkuli arlaannaataluunniit aalisarneq qimassanngikkaat illersuutigaat, taakkumi paggatassanik aalisarnissamut inummulluunniit pisassiissutinik, aningaasaliisunut qularnaveeqqutigisinnaasaminnik ikaarsaarnissamut toqqaanissamut kiffaanngissuseqartut oqaatigaat.
- Naalakkersuisut inatsisartullu neriuuteqarput, kinguneqaatissanullu nalilersuinerit amigaataapput, aalisarnermullu inatsisissatut siunnersuut innuttaasut, suliffeqarfiit kommunilluunniit tusaaniarnagit sukkasuumik suliarineqartoq aalajangiiffigaat.
- Tusaajumasoqannginnera tamat oqartussaaqataanerannut navianartorsiortitsivoq, borgmester Palle Jerimiassen oqarpoq.
Jens Kristian Therkelsen ilassusiivoq:
- Pisassanik aalajangersaanermi pissutsit allat ilanngunneqartarnerisa eqqummaariffigineqarneq ajornera uggornarpoq. Biologit siunnersuinerisa saniatigut pisassat amerlassusissaattut akuerisap (TAC) aalajangersarnissaanut atuisut aamma akuutinneqassapput.
