Borgmesterip filmiliortartut ineriartortut ikiorniarpai
Suliffinnik amerlanerusunik pilersitsinissaq siunertaralugu filmiliornermik inuussutissarsiorneq ineriartortoq qanoq ikiorneqarsinnaanersoq Kommuneqarfik Sermersuumit misissorneqassaaq.
Kommuneqarfik Sermersuumi borgmesterip Avaaraq Olsenip suliffissat amerlanerusut pilersinniarlugit kommuni filmiliortartunut ikiorsiissasoq kissaatigaa.
Leiff Josefsen
Borgmesterip IA-meersup Avaaraq Olsenip siunnersuutai marluk Kommuneqarfik Sermersuumi kommunalbestyrelsip kingullermik junip naanerani ataatsimiinnerani tigulluarneqarput.
- Filmiliornerit kulturikkuinnaanngitsoq attuumassuteqarput. Ukiuni kingullerni kalaallit filmii
isiginnaartitsisartuilu amerlanerusut nunat tamalaat filmertarfiiniittut takutippaat, filmiliornerit
Kalaallit Nunaata nittarsaanneqarneranuinnaq iluaqutaaginnarani aamma suliffissanik pilersitsisut, Avaaraq Olsenip siunnersuutaani aallarniutigalugu oqaatigineqarpoq, taannalu marlunnik sammisaqarpoq.
Filmfestivalimut aalajangersimasumik tapiisarneq
“Kommunitsinni Kommuneqarfik Sermersooq qanoq ililluni
filmiliornermik inuussutissarsiornerup annertusiartortup ineriartorneranut qanoq pitsaanerpaamik
tapersiissanersoq allaffeqarfik innersuussuteqassasoq” siunnersuutigineqarpoq.
- Taassuma saniatigut isumaqarpunga, Nuuk Film Festivali maanna ilaatigut Sermeq Fonden
aqqutigalugu aningaasalerneqartoq, Kommuneqarfik Sermersuuminngaanniit
aningaasalerneqarnissaanut qulakkeerneqassagaluartoq, taamaalilluni peqatigiiffik Kommuneqarfik
Sermersuuminngaanniit aningaasaliiffigineqassanerlutik ukiumiit ukiumut
nalornissutigiunnaarniassammassuk. Taamaattumik qulaani allassimasunut tapiliullugu
siunnersuutigaara, qanoq ililluni pitsaanerpaamik ukiut tamaasa festivalimut ingerlatsinermut
tapiissuteqartoqartarsinnaanersoq allaffeqarfimmit misissorneqassasoq.”
Siunnersuut akuerineqarpoq Aningaasaqarnermut Inuussutissarsiornermullu Ataatsimiititaliamut suliassanngortinneqarluni
