Borgmesterit KNR-ikkut ukiortaami oqalugiartinneqassanngillat

Ileqqoq malillugu ukioq nutaaq aallartikkaangat Kalaallit Nunaanni borgmesterit knr tv-kut oqalugiaataat aallakaatinneqartarput, tamannali ukiortaami 2025-mi pinngitsoortussanngortoq Mathias Davidsen-ip, knr tv-mi pisortap, oqaatigaa.

Borgmesterit ugguarput

Borgmesterit tamarmik ukiortaami tv-kut oqalugiartussaannginnertik tupaallaatigalugulu uggoraat.

- Tupaallappunga aamma pakatsivunga, ileqqullu taamaattup unitseriataarneqarnera apeqquserlugu. Utoqqatsissutaasoq “qinersisoqarnissaanut qanippallaaqimmat” - taanna akueriuminaatsippara, Avannaata Kommuneani borgmester Palle Jeremiassen (aataviittoq) oqarpoq, nassuiaavorlu ileqqutoqqamik taamatut ingerlatsisarneq iluatinnartutut isigigini.

Kommune Qeqertalimmi borgmesterip, Ane Hansenip (IA) uggoraattaaq ukiumi nutaami oqalugiarnissamut periarfissinneqannginnertik.

- Tamatta immaqa malinnaalluartarpugut Naalakkersuisut siulittaasuat, borgmesterit aammalu kunngikkormiut tv-kut oqalugiaraangata; suut ukiup tullissaanut tikkuussissutigineqarnersut aammalu ukiumi qaangiuttumi suut maluginiangassaanersut oqaatigisarmassuk, Ane Hansen oqarpoq.

Borgmester Malik Berthelsenip (S), Qeqqata Kommunea, knr-ip taamatut aalajangersimanera ataqqigini tunngavilersuutigineqartorli eqqumiigikujukkini oqaatigaa.

- Kommunemi siuttuusup ukiortaami oqalugiartarnera isumaqaraluarpunga inuiaqatigiinnut pingaaruteqarlunilu soqutigineqartaraluartoq. Uggorivara - taamatut oqaannaraanni immaqa tulluarneruvoq, Malik Berthelsen nassuiaavoq.

Kommuneqarfik Sermersuumi borgmester, Avaaraq Olsen (IA) aamma isumaqarpoq ukiortaami borgmesterit oqalugiaataasa tv-koortinniarneqannginnerat kukkunerusoq pissusissamisuunngittorlu qinersinissap qanippallaarnera tunngavigiinnarlugu aalajangerneqarsimammat.

Qineqqusaarutaanngilaq

- Amerlasuunit tusartarpara tv-kut ukiumi qaangiuttumi ukiumilu nutaami oqalugiarnerit malinnaaffiginissaat pingaartinneqartartoq, qineqqusaarfittut isiginngilara kisianni pisussaaffittut isigaara, taamatut borgmesteritut nalilersuineq pisussanillu oqariartuuteqarneq, Avaaraq Olsen nassuiaavoq.

Borgmester Stine Egede (IA), Kommune Kujallermiit aamma uggoraa ukiut tamaasa pisartoq qinersivissaq ukioq piinnarlugu aallakaatittussaajunnaarsimammat, neriuutigaalu siunissami knr- imit taamatut aalajangerneq ileqqunngussanngittoq.

- Borgmesterit oqalugiaatigisartagaat politikkerfiuneq ajorput, annertunerusumik siunissamut eqqarsaatinik aamma kissaatinik, qujaniarnernik aammalu innuttaasunut oqariartuutinik pittaasunik imaqartarmata - periarfissaq taanna atortinneqanngimmat uggorivara.

Kunngi Frederik perngaammik aamma ukiup naanerani tv-kut oqalugiartussaavoq, ilissili tassa ukioq manna tv-kut oqalugiarnissamut periarfissinneqanngittoorlusi. Tamanna qanoq isumaqarfigaajuk?

- Taanna assorsuaq uggornarpoq. Allatut oqaasertaleruminaappoq, Stine Egede (IA), Kommune Kujallermi borgmesteri oqarpoq.